اداکارہ نازش جہانگیر نے پہلی بار خود پر لگے فراڈ کے الزامات پر لب کشائی کرتے ہوئے دعویٰ کیا ہے کہ ان پر لگائے گئے الزامات بے بنیاد اور پلانٹڈ تھے، انہیں بلیک میل کرنے اور ان سے پیسے بٹورنے کی کوشش کی گئی۔نازش جہانگیر نے حال ہی میں ندا یاسر کے رمضان شو میں شرکت کی، جہاں انہوں نے پہلی بار خود پر اسود ہارون نامی آرٹسٹ کی جانب سے لگائے گئے فراڈ کے الزامات پر کھل کر بات کی۔پروگرام میں نازش جہانگیر نے اسود ہارون کا نام نہیں لیا، تاہم انہوں نے دعویٰ کیا کہ ان پر منظم منصوبہ بندی کے تحت جھوٹے الزامات لگا کر ان کا نام اور کیریئر خراب کرنے کی کوشش کی گئی۔اداکارہ کا کہنا تھا کہ ان پر الزامات لگانے والے کو کوئی نہیں جانتا، وہ ان پر الزامات لگا کر اور ان کا نام استعمال کرکے شہرت حاصل کرنا چاہتے تھے۔انہوں نے بتایا کہ انہیں بری طرح بلیک میل کرنے کی کوشش کی گئی اور ساتھ ہی ان سے بلیک میلنگ کے ذریعے پیسے بٹورنے کی کوشش بھی کی گئی۔ان کے مطابق انہوں نے محنت کرکے انڈسٹری میں نام بنایا اور اگر وہ بھی جھوٹے الزامات پر اسی وقت رد عمل دیتیں تو ان کا نام مزید خراب ہوتا اور الزامات لگانے والے کا مقصد پورا ہوجاتا۔نازش جہانگیر کا کہنا تھا کہ وہ ذاتی زندگی اور خود پر لگے الزامات کے جوابات اور وضاحتی سوشل میڈیا پر نہیں دیتیں اور اگر وہ خود پر لگے الزامات کے جوابات دیتیں تو لوگ انہیں ہی غلط سمجھتے اور الزامات لگانے والے شخص کی کوشش کامیاب ہوجاتی۔انہوں نے بتایا کہ اس وقت وہ شدید پریشان ہوگئی تھیں لیکن انہیں والد نے سمجھایا کہ الزامات کا جواب سوشل میڈیا پر دینے کے بجائے الزامات لگانے والے کے خلاف قانونی کارروائی کرو۔نازش جہانگیر کے مطابق انہوں نے الزامات لگانے والے کے خلاف قانونی کارروائی کی اور اب معاملہ تھم گیا ہے۔اداکارہ کا کہنا تھا کہ ان پر الزامات لگانے کا معاملہ اس لیے تھم گیا، کیوں کہ انہوں نے کوئی رد عمل نہیں دیا اور خاموش رہیں۔اسی دوران انہوں نے پیکا آرڈیننس کا حوالہ بھی دیا اور بتایا کہ مذکورہ قانون کے تحت کوئی بھی سوشل میڈیا پیج، یوٹیوبر اور بلاگر کسی بھی اداکار سمیت کسی بھی شخص کی کوئی تصویر، ویڈیو یا بات ان کی اجازت کے بغیر نہیں لگا سکتا اور خلاف ورزی پر قانونی کارروائی ہوسکتی ہے۔خیال رہے کہ ستمبر2024 میں لاہور کی مقامی عدالت نے نازش جہانگیر کے خلاف دائر فراڈ کے مقدمے میں ان کی ضمانت مسترد کردی تھی۔ان کے خلاف ابھرتے ہوئے اداکار اسود ہارون نے فراڈ کا مقدمہ دائر کیا تھا، بعد ازاں ایک انٹرویو میں مذکورہ اداکار نے دعویٰ کیا کہ انہوں نے گزشتہ چند سال میں نازش جہانگیر کو لاکھوں روپے نقد اور 50 لاکھ سے زائد مالیت کی گاڑی اور دیگر قیمتی تحائف بھی دیے، اداکارہ نے انہیں شوبز میں بطور ہیرو متعارف کرانے کا وعدہ کیا تھا۔نازش جہانگیر نے اب تقریبا 6 ماہ بعد خود پر لگے الزامات پر بات کرتے ہوئے انہیں جھوٹا قرار دیا ہے۔
