پاکستان فیڈرل یونین آف جرنلسٹس نے سینئرصحافی محسن جمیل بیگ کیخلاف بے بنیاد مقدمات کو آزادی اظہار رائے کے منافی قرار دیا ہے پی ایف یو جے کے صدر شہزادہ ذوالفقار نے مطالبہ کیا ہے کہ بے بنیاد مقدمات فوری طور پر ختم کئے جائیں اور انہیں رہا کیا جائے،محسن بیگ کی رہائی اور ان کے اداروں کی بندش کے حوالے سے قائم ایکشن کمیٹی کی زیر قیادت احتجاجی مظاہرہ دوسرے روز بھی جاری رہاجس میں پی ایف یو جے کے صدر شہزادہ ذوالفقار ، ایڈیٹرشمشاد مانگٹ ،پی ایف یو جے کے سابق صدر افضل بٹ ،نیشنل پریس کلب کے صدر انور رضا،چیئرمین ایکشن کمیٹی طارق علی ورک سمیت دیگر صحافیوں اور سیاسی و سماجی شخصیات نے بڑی تعداد میں شرکت کی، پی ایف یو جے کے صدر نے کہا محسن بیگ کیخلاف اقدامات سے ثابت ہوگیا کہ ایف آئی اے کسی بھی قانون اور ضابطے کو نہیں مانتی ہے ،واقعہ کیخلاف پی ایف یو جے کے زیر انتظام ملک گیر سطح پر احتجاج کیا گیا ہے ، اس سے قبل بھی پی ایف یو جے نے صحافتی اداروں اور صحافیوں کو درپیش خطرات کیخلاف مزاحمت کی ہے،اگر کسی بھی شخص یا ادارے کو کسی پروگرام پر اعتراض ہے تو پہلے اس حوالے سے نوٹسز جاری کرے مگر لگتا ہے کہ محسن بیگ کی گرفتاری کا اصل مقصد صحافتی کمیونٹی کو ہراساں کرنا ہے اور یہ پیغام دینا ہے کہ اگر حکومت پر تنقید کروگے تو یہ حال ہوگا ،انہوں نے کہا کہ حکومت نے راتوں رات پیکاآرڈیننس جاری کرکے کسی کوبھی آزادی اظہار رائے کے نام پر مہینوں حراست میں رکھنے کا منصوبہ بنایا ہے ، محسن بیگ حکومتی پالیسیوں پر نکتہ چینی کرتے تھے اور وہ حکومت کے ریڈار پر تھے، موجودہ حکومت تنقید برداشت نہیں کرسکتی، وقت آگیا ہے کہ ہم متحد ہوکر حالات کا مقابلہ کریں ،میڈیا پر مزید سخت حالات آنیوالے ہیں ،ہم نے میڈیا ورکرز کے حقوق کا تحفظ کرنا ہے، افضل بٹ نے کہاکہ حکومت آزادی اظہاررائے پر پابندی لگانے کیلئے اوچھے ہتھکنڈوں پر اتر آئی ہے ،محسن بیگ کی گرفتاری صحافت کا گلہ گھونٹنے اور دونوں اداروں کے سینکڑوں کارکنوں کو بیروزگار کرنیکی سازش ہے ۔
