وفاقی دارالحکومت کی ضلعی عدالت نے ہتک عزت کے ایک کیس میں جنگ جیو گروپ اور اس کے ایڈیٹر انچیف میر شکیل الرحمان کے حق میں تاریخی فیصلہ سنایا ہے۔ایک صحافی کیخلاف دائر کردہ اس کیس میں کہا گیا تھا کہ میر شکیل الرحمان کیخلاف جعلی، من گھڑت، توہین آمیز مواد غیر ملکی ویب سائٹس پر شائع کرایا جا رہا ہے۔ایڈیشنل سیشن جج اسلام آباد محمد عدنان نے 6؍ صفحات پر مشتمل فیصلے میں بول ٹی وی کے طیب بلوچ کو حکم دیا ہے کہ وہ میر شکیل الرحمان کو 10؍ کروڑ روپے ہرجانہ ادا کریں اور ساتھ ہی انہیں یہ ہدایت بھی کی ہے کہ وہ نہ صرف شکایت گزار سے معافی مانگیں بلکہ اس معافی کو اُسی انداز سے وسیع پیمانے پر شائع کرایا جائے جیسے اُن کیخلاف توہین آمیز مواد شائع کرایا گیا تھا۔ہتک عزت آرڈیننس کے تحت دائر کردہ کیس میں ایڈیٹر انچیف نے استدعا کی تھی کہ نامور سیاست دانوں، میڈیا شخصیات اور دیگر افرد کی جانب سے مذکورہ توہین آمیز مواد شیئر کیے جانے کی وجہ سے اُن کی ساکھ کو شدید نقصان پہنچا ہے۔جنگ اور جیو گروپ نے کہا تھا کہ صحافی کو دو نوٹس بھیجے گئے تھے لیکن انہوں نے کوئی جواب نہیں دیا۔ انہوں نے عدالت کو بتایا کہ جنگ اور جیو کی جانب سے برطانوی ویب سائٹ کے ڈائریکٹر ایڈم گیری کو بھی لیگل نوٹس بھیجا گیا تھا، اور انہوں نے ان الزامات کی بذات خود تحقیق کرکے الزامات کو بے بنیاد قرار دیا۔ایڈم گیری نے غیر مشروط معافی مانگی بلکہ اپنی ویب سائٹ سے مذکورہ آرٹیکل بھی ہٹا دیے۔ برطانوی ویب سائٹ کی جانب سے معافی شائع کیے جانے پر طیب بلوچ نے روسی ویب سائٹ پر توہین آمیز آرٹیکل شائع کرانا شروع کر دیے اور جنگ جیو گروپ کے ایڈیٹر انچیف کیخلاف توہین آمیز کلمات کا سلسلہ جاری رکھا۔ میر شکیل الرحمان نے اپنی درخواست میں کہا تھا کہ ایسے بے بنیاد، من گھڑت اور جعلی الزامات کی وجہ سے ان کی اور ان کے ادارے کی ساکھ مجروح ہوئی ہے۔ کیس کی سماعت کے دوران طیب بلوچ کئی مرتبہ عدالت میں پیش نہ ہوئے اور اپنے الزامات کے حوالے سے ایک بھی ثبوت پیش نہ کر سکے۔
