وزیر مملکت اطلاعات و نشریات میاں فرخ حبیب نے کہا ہے کہ حکومت میڈیا کی آزادی پر یقین رکھتی ہے ۔ میڈیا ورکرز کےحقوق کے تحفظ کیلئے حکومت اقدامات کر رہی ہے ۔کامیاب نوجوان پاکستان‘‘سکیم کے تحت میڈیا ورکرز کو آسان شرائط پر قرضے فراہم کئے جائیں گے جس کیلئے جلد لاہور، فیصل آباد، ملتان ، اسلام آباد اور دیگر بڑے شہروں کے پریس کلب اور ایسوسی ایشنز کے ساتھ “ایم او یو” سائن کئے جائیں گے۔ان خیالات کا اظہار انہوں نے الیکٹرانک میڈیا ایسوسی ایشن فیصل آباد کے زیر اہتمام اقبال اسٹیڈیم میں منعقدہ جشن آزادی کی تقریب سے خطاب میں کیا۔ وزیر مملکت نے ارکان اسمبلی لطیف نذر، شکیل شاہد اور ایسوسی ایشن کے عہدیداران کے ہمراہ جشن آزادی کا کیک کاٹا ۔ایسوسی ایشن کے صدر حسام احمد نے اظہار خیال کرتے ہوئے کہا کہ الیکٹرانک میڈیا کے نمائندگان کے حقوق کے تحفظ اور مسائل کے حل کیلئے ایسوسی ایشن کا قیام عمل میں لایا گیا ہے یہ ایک غیر سیاسی پلیٹ فارم ہے جو الیکٹرونک میڈیا ورکرز کی بہتری کیلئے کام کرے گا۔وزیر مملکت نے ایسوسی ایشن کے عہدیداران کو میڈیا ایکریڈیشن کارڈ بنانے اور صحافی کالونی کی مجوزہ فہرست میں بعض سینئر الیکٹرانک میڈیا نمائندگان کے ناموں کو شامل نہ کرنے بارے تحفظات دور کرنے کے حوالہ سے یقین دہانی کروائی ۔اس موقع پر سینئر نائب صدر خرم شہزاد، نائب صدر میاں منور اقبال ، سیکرٹری شہروز عباد، سیکرٹری اطلاعات رمضان مرزا، جوائنٹ سیکرٹری حماد احمد ، ایگزیکٹو اور دیگرممبران بھی موجود تھے۔
