آگ برساتی گرمی میں گھنٹوں بجلی کی بندش آئیسکو صارفین کے لئے عذاب بن گئی۔ میڈیا ٹاؤن بلاک اے کے صارفین کے مطابق گزشتہ روز بھی سٹریٹ 21 میں نصب ٹرانسفارمر کا فیوز اڑنے کے باعث درجنوں گھروں کی بجلی آٹھ گھنٹے بند رہی۔ اس دوران کورنگ سب ڈویژن کمپلینٹ آفس کا عملہ فون مصروف رکھ کر خواب خرگوش کے مزے لیتا رہااور مکینوں کو خود کمپلینٹ آفس جا کر بار بار اپنی شکایت درج کروانا پڑی۔ گزشتہ رات ساڑھے 12بجے جانے والی بجلی صبح آٹھ بجے کے بعد بحال ہو سکی۔ اس دوران کمپلینٹ آفس عملے سمیت متعلقہ حکام بھی متعدد بار کوشش کے باوجود فون سننے سے گریزاں رہے ۔ اس سے قبل گزشتہ ہفتے بھی ایک معمولی فیوز اڑنے سے بند ہونے والی بجلی عملے کی بے حسی کے باعث 9گھنٹے بعد بحال ہو سکی تھی۔ ماضی میں بھی اسی ٹرانسفارمر میں وولٹیج کمی بیشی کے باعث صارفین کے قیمتی برقی جل گئے تھے مگر شکایت کے باوجود کسی کے کان پر جوں تک نہیں رینگی۔ مکینوں نے وفاقی وزیر بجلی و پانی، آئیسکو چیف اور متعلقہ ایکسیئن سے صورتحال کا نوٹس لینے اور یہ مسئلہ مستقل بنیادوں پر فوری حل کروانے کا مطالبہ کیا ہے۔
