ماہرین کا کہنا ہےکہ میڈیا انڈسٹری دباؤ کا شکار، پریس فریڈم جیسے چیلنجز کا سامنا ہے،جھوٹی خبریں لوگوں کو گمراہ کرتی ہیں،سوشل میڈیا سرفہرست ہے،جس کے تدارک کے لئے کوششیں ناگزیر ہوچکی ہیں،سوشل میڈیاپلیٹ فارمز کے ذریعے معلومات کی فراہمی تیز ہوچکی ہے مگر اس کی سچائی کی تصدیق مشکل ہے،دنیا بھر میں چارارب افراد سوشل میڈیا کا استعمال کرتے ہیں،روزانہ50لاکھ ٹوئٹس پوسٹ جبکہ یوٹیوب پر ایک ارب اور فیس بک پر 10ارب ویڈیوز روزانہ کی بنیاد پر شیئرکی جاتی ہیں جو اس بات کا منہ بولتاثبوت ہے کہ سوشل میڈیارابطے کا ایک بہت بڑا ذریعہ ہے، ان خیالات کا اظہار امریکی پروفیسر ڈاکٹر لی آرٹز،خالد عراقی، نصرت ادریس، سیمامغل، فوزیہ نازنے شعبہ ابلاغ عامہ جامعہ کراچی کے زیر اہتمام اور سندھ ہائرایجوکیشن کمیشن،گرین وچ یونیورسٹی اور انسٹی ٹیوٹ آف پالیسی اسٹڈیز کے اشتراک سے منعقدہ 2روزہ بین الاقوامی میڈیا کانفرنس بعنوان: ”میڈیا میں سچائی اور موجودہ رجحانات“ کی افتتاحی تقریب سے خطاب کرتے ہوئے کیا۔ ڈاکٹر لی آرٹز نے مزید کہا کہ ایک جھوٹی خبر نے عراق جیسے ملک کے خلاف جنگ چھیڑی اور تحقیق کئے بغیر ایک جھوٹی خبر کی اشاعت اور تشہیر نے ایک ملک کو جنگ میں جھونک دیا،غلط معلومات اور جھوٹ کو سیاسی ہتھیاروں کے طور پر استعمال کیاجاتاہے۔ جامعہ کراچی کے وائس چانسلر پروفیسر ڈاکٹر خالد محمود عراقی نے کہا کہ کسی بھی خبر کے نشر یااشاعت کرنے سے پہلے اس کی تحقیق ضروری ہے کہ نشرہونے والی خبر درست ہے یا حقائق کے منافی ہےلیکن بدقسمتی سے ہمارے یہاں ایسا نہیں ہوتا بلکہ بریکنگ اور ریٹنگ کی دوڑ میں بغیر تصدیق وتحقیق خبر نشر یا شائع کردی جاتی ہے اوراس خبر کے ریاست،عام افراد اور ملکی معیشت پر اثرات کو پس پشت ڈال دیا جاتاہے جو لمحہ فکریہ ہے اور بہت تیزی سے اس کے معاشرے پر منفی اثرات مرتب ہوتے ہیں،میڈیاکو ریاست کا چوتھاستون بھی کہا جاتاہے کیونکہ معاشرے کو سنوارنے میں ذرائع ابلاغ کا کلیدی کردار ہوتاہے لیکن اگر یہ ہی مثبت کی جگہ منفی اور بے بنیاد خبروں کی اشاعت شروع کردے تو پورامعاشرہ بگاڑ کا شکارہوسکتاہے،پاکستان میں میڈیا انڈسٹری دباؤ کا شکار ہے اور اسے پریس فریڈم جیسے چیلنجز کا بھی سامنا ہے۔جامعہ کراچی کے شعبہ صحافت نے ملک کو بہترین صحافی اور میڈیا پرسنز دیے ہیں اور ملک میں صحافتی شعبے کی ترقی میں اہم کردار ادا کیا ہے۔ میں مذکورہ کانفرنس کے انعقاد پرشعبہ ابلاغ عامہ جامعہ کراچی کو مبارکباد پیش کرتاہوں
