وفاقی وزیر اطلاعات مریم اورنگزیب نے کہا ہے کہ جرنلسٹس پروٹیکشن (ترمیمی) بل وزارت اطلاعات کو موصول ہو چکا ہے، اس پر کام جاری ہے، جلد ہی یہ بل پارلیمنٹ سے منظور کروایا جائے گا، صحافیوں کو تنخواہوں کی ادائیگی یقینی بنانے کے لئے وزارت اطلاعات نے میڈیا ہائوسز کو ریکارڈ ادائیگیاں کی ہیں، میڈیا ہائوسز کی ادائیگیوں کو صحافیوں کو تنخواہوں کی ادائیگی سے منسلک کر رہے ہیں، ان خیالات کا اظہار انہوں نے پاکستان فیڈرل یونین آف جرنلسٹس(پی ایف یو جے) کے نومنتخب عہدیداران کے وفد سے ملاقات میں کیا۔۔وفد میں پی ایف یو جے کے صدر افضل بٹ، سیکریٹری جنرل ارشد انصاری، سیکریٹری فنانس لالہ اسد پٹھان سمیت دیگر عہدیداران شامل تھے۔وفاقی وزیر اطلاعات نے پی ایف یو جے کے نومنتخب عہدیدان کو مبارکباد دی۔۔مریم اورنگزیب کا کہنا تھا کہ حکومت آزادی اظہار رائے پر کامل یقین رکھتی ہے، صحافت ریاست کا اہم ستون ہے اور مسلم لیگ (ن) ملک میں آزادی ء صحافت کی امین ہے، وزیراعظم شہباز شریف کی قیادت میں آزادی ء صحافت کے فروغ کے لئے ہر ممکن اقدامات اٹھا رہے ہیں، ہم میڈیا اور اظہار رائے کی آئینی آزادیوں پر یقین رکھتے ہیں،صحافیوں کے حقوق کا تحفظ حکومت کی اولین ترجیح ہے،پی ایف یو جے کے وفد نے وفاقی وزیر اطلاعات کو صحافی برادری کو درپیش مسائل سے بھی آگاہ کیا۔۔وفاقی وزیراطلاعات نے صحافی برادری کے مسائل جلد حل کرنے کی یقین دہانی کرائی اور امید ظاہر کی کہ پی ایف یو جے کی نومنتخب باڈی صحافی برادری کے اعتماد پر پورا اترے گی اور ان کے مسائل کے حل کیلئے ہر ممکن اقدامات اٹھائے گی۔۔ملاقات میں پرنسپل انفارمیشن آفیسر (پی آئی او) مبشر حسن سمیت وزارت اطلاعات کے دیگر حکام بھی موجود تھے۔
