قومی اسمبلی کی قائمہ کمیٹی برائے اطلاعات ونشریات کے چیئرمین اور مسلم لیگ (ن) کے رہنما جاوید لطیف نے کہا ہے کہ میڈیا کنٹرول اتھارٹی بل کو قائمہ کمیٹی سے کسی صورت منظور نہیں ہونے دیں گے۔۔ میڈیا پرجب بھی پابندیاں لگیں نتائج ملک کوبھگتا پڑے ۔ پابندیوں کے خلاف لڑنے اور مرنے کے لیے تیار ہیں اگر بٹن دبانے سے نیا پاکستان نہیں بن سکتا تو بٹن دبانے سے اظہار رائے پر پابندی بھی نہیں لگ سکتی۔نیشنل پریس کلب اسلام آباد میں میٹ دی پریس کانفرنس میں اظہار خیال کرتے ہوئے میاں جاوید لطیف نے کہا کہ جمہوریت، احتساب، انتخابات اور نتائج پر کنٹرول چاہو گے تو پھر ماضی کے حالات بھی ذہن میں رکھنا ہوں گے ، کیا ہمیں مشرقی پاکستان سے کوئی سبق نہیں سیکھنا چاہیے ، کیا غلطی کی نشاندہی کرنا غداری کے زمرے میں آتا ہے ؟ ہر چیز کو کنٹرول کیا جائے گا تو نتائج کو کوئی بھی کنٹرول نہیں کر سکے گا۔
