میڈیااتھارٹی پر صحافیوں کا ساتھ دیں گے، شہبازشریف۔۔

مسلم لیگ (ن) کے صدر میاں شہبازشریف سے میڈیا تنظیموں کے نمائندوں نے کراچی میں ملاقات کی۔ملاقات میں آل پاکستان نیوزپیپرسوسائیٹی، کونسل آف پاکستان نیوزپیپر ایڈیٹرز، پاکستان براڈ کاسٹرز ایسویسی ایشن اور ایسوسی ایشن آف الیکڑانک میڈیا ایڈیٹرز اینڈ نیوز ڈائریکٹرزکے نمائندے شامل تھے۔قومی اسمبلی قائد حزب اختلاف شہباز شریف نے پاکستان فیڈرل یونین آف جرنلسٹس اور کراچی یونین آف جرنلسٹس کے عہدیداروں سے بھی ملاقات کی۔ دریں اثنا شہباز شریف کا کہنا ہے کہ پاکستان میڈیا ڈیولپمنٹ اتھارٹی کو مسلم لیگ ن اور پی ڈی ایم مسترد کرچکے، تمام سیاسی جماعتوں سے مل کر پارلیمنٹ میں اس کالے قانون کی مخالفت کریں گے۔۔کراچی میں میڈیا تنظمیوں کے نمائندوں سے گفتگو کرتے ہوئے شہباز شریف کا کہنا تھا کہ میڈیا ڈیولپمنٹ اتھارٹی پر قانون سازی کی حکومتی کوشش پوری قوت سے ناکام بنائیں گے، آزاد صحافت، جمہوریت و آئینی آزادیوں کے لیے یہ معاملہ زندگی اور موت کا مسئلہ ہے۔شہباز شریف کا کہنا تھا کہ میڈیا ڈیولپمنٹ اتھارٹی پر مشترکہ اپوزیشن کو اعتماد میں لیں گے، حساس معاملہ ہے اجاگر کریں گے، شاید حکومتی بینچوں میں کسی کا ضمیر جاگ جائے۔قائد حزب اختلاف نے کہا کہ اگر اخلاص کا مظاہرہ ہوا تو سینیٹ میں اس کالے قانون کی منظوری روکنا ممکن ہے۔شہباز شریف نے کہا کہ معاشرے میں جھوٹ، نفرت کا زہر گھولا گیا، میڈیا اس سے بہترطور پر آگاہ ہے، تین برسوں میں میڈیا پر لگنےوالی پابندیوں کی نظیر نہیں ملتی۔ انہوں نے کہا کہ  میڈیا اتھارٹی پر صحافیوں کے شانہ بہ شانہ ہیں، بھرپور ساتھ دیں گے۔شہباز شریف نے مزید کہا کہ تین سال میں حکومتی بندشوں، قدغنوں سے میڈیا کے بے شمار لوگ بے روزگار ہوگئے، معذرت سے کہتا ہوں عمران نیازی اپوزیشن میں تھے تو میڈیا کے لاڈلے تھے۔