اسلام آباد میں اسد عمر اور فواد چودھری کی پریس کانفرنس کے دوران صحافی مطیع اللہ جان اور فواد چودھری میں تلخ کلامی ہو گئی ، دونوں جانب سے سخت جملوں کا تبادلہ کیا گیا۔اسلام آباد میں پریس کانفرنس کے دوران فواد چودھری نے گفتگو شروع کی جبکہ صحافی مطیع اللہ جان کی جانب سے ان سے سوال پوچھا گیا ، صحافی نے ان سے سوال پوچھا جس پر فواد چودھری نے کہا کہ تم صحافی ہو ہی نہیں ، تم صرف ایک یو ٹیوبر ہو ، کرائے کے صحافی ہو، میں تمہاری کسی بات کا جواب نہیں دے رہا۔فواد چودھری کی جانب سے سخت زبان کے استعمال پر صحافیوں نے احتجاج کیا اور نعرے بازی کی ، صحافیوں کی جانب سے فواد چودھری کی پریس کانفرنس کا بائیکاٹ کر دیا گیا اور مطالبہ کیا گیا کہ اگر وہ معذرت کر لیں تو پریس کانفرنس بحال کر دی جائے گی لیکن فواد چودھری نے معذرت نہیں کی جس پر صحافیوں نےمائیک اٹھا لئے اور احتجاج کیا۔دریں اثنا سینئر صحافی سہیل وڑائچ نے معاملے پر گفتگو کرتے ہوئے کہا کہ فوادچوہدری کی جانب سے اپنایا گیا رویہ غیر مناسب تھا، انہیں ایسا نہیں کرنا چاہیے تھا ، فواد چوہدری موقف پیش کرتے اور سوال کا جواب دیا جاتا ۔ تجزیہ کار مظہر عباس کا کہناتھا کہ آپ تین سال وزیر اطلاعات رہے ہیں، آپ بتائیں کون کون کہاں سے پیسے لیتاہے ، فواد چوہدری اختلاف کر سکتے تھے اور کہتے کہ میں سوال کا جواب نہیں دینا چاہتا لیکن جس طرح کی زبان استعمال کی گئی وہ نامناسب تھی ، جس طریقے سے آپ جواب دیتے ہیں وہ مناسب نہیں تھا ، اگر فواد چوہدری معذرت کر لیتے تو کوئی حرج نہیں تھا ۔میڈیا ٹاک میں موجود اسد عمر بچ بچاﺅ کروانے کی بھر پور کوشش کرتے رہے لیکن فواد چوہدری اور سینئر صحافی مطیع اللہ جان کے درمیان تلخ جملوں کا تبادلہ چلتا رہا ۔۔
