معروف سنگر نصیبو لعل نے رات تھانے میں گزاری۔۔

پنجابی لوک اور فوک گلوکارہ نصیبو لال کے شوہر کو پولیس نے فائرنگ کرکے ایک شخص کو زخمی کرنے کے کیس میں گرفتار کرلیا۔ پولیس نے بتایا کہ گلوکارہ کے شوہر نوید بلوچ کو شاہدرہ ٹاؤن میں اپنے محلے میں فائرنگ کرکے ایک شخص کو زخمی کرنے کے کیس میں گرفتار کیا گیا۔گلوکارہ کے شوہر کے خلاف پولیس کی مدعیت میں مقدمہ دائر کرکے ان کے شوہر نوید بلوچ کو گرفتار کرکے تھانے لایا گیا۔مقدمے میں موقف اختیار کیا گیا کہ ملزم نوید بلوچ اور دیگر اہل محلہ کے افراد میں لڑائی جھگڑا ہوا، جس دوران گلوکارہ کے شوہر نے فائرنگ کردی۔فرسٹ انفارمیشن رپورٹ (ایف آئی آر) کے متن کے مطابق جھگڑے کے دوران نوید بلوچ کی فائرنگ سے ایک شخص زخمی، جسے فوری طور پر ہسپتال منتقل کردیا گیا۔لاہور پولیس نے جائے وقوع پر پہنچ کر ملزم نوید بلوچ کو گرفتار کرکے تھانے منتقل کیا، جنہیں رہا کرانے کے لیے نصیبو لال بھی تھانے پہنچی اور پوری رات تھانے میں گزاری۔فوری طور پر نصیبو لال نے واقعے پر کوئی بیان جاری نہیں کیا جب کہ متاثرہ فریقین کی جانب سے بھی تاحال کوئی موقف سامنے نہیں آ سکا۔