معروف لکھاری اور مزاح نگار انور مقصود کے لکھے گئے تھیٹر ” ساڑھے 14اگست” کو یوم آزادی کے دن پیش کیا جائے گا۔تفصیلات کے مطابق کاپی کیٹ پروڈکشن نے انسٹاگرام پر “ساڑھے 14اگست “کا ٹیزر جاری کرتے ہوئے اس تھیٹر کو یوم آزادی کے دن سے کراچی کے آرٹس کونسل میں پیش کرنے کی تصدیق کر دی ہے۔ٹیزر میں دکھایا گیا ہے کہ فوٹوگرافر مہاتما گاندھی اور قائداعظم کو ایک دوسرے کے قریب ہونے کا کہتے ہیں تاکہ ان کی تصور اچھی آئے ، جس پر قائد اعظم مزید قریب ہونے سے معذرت کرتے ہیں۔اسی دوران ٹیزر میں فوٹوگرافر انور مقصود کو ان کے درمیان میں آکر بیٹھنے کا کہتے ہیں اور اسی دوران ہی فوٹوگرافر ان کی تصویر کھینچ لیتا ہے۔تھیٹر پلے کی کہانی کے بارے میں گفتگو کرتے ہوئے انور مقصود نے کہا کہ اس کھیل میں ایک شخص نے قائداعظم اور گاندھی پر مقدمہ دائر کیا ہے کہ تقسیم کے بجائے اگر یہ ایک ہی ریاست رہتی تو کتنا اچھا ہوتا۔خیال رہے کہ انور مقصود نے رواں برس فروری میں اعلان کیا تھا کہ وہ تھیٹر پلے ساڑھے چودہ اگست بنانے جارہے ہیں اس موقع پر انہوں نے کہا تھا کہ 2011 میں ہم نے” پونے چودہ اگست کیا”، لوگوں نے کہا کہ 14اگست کیوں نہیں، میں نے کہا کہ جس دن 14اگست ہوگی تب اعلان کر دیں گے۔ 3 سال بعد “سوا 14اگست “لکھا یہ اسی سلسلے کی آخری کڑی ‘ساڑھے 14اگست “ہے۔
