وزیر اطلاعات پنجاب عظمیٰ بخاری نے کہا ہے کہ وزیراعلیٰ پنجاب مریم نواز صوبے کے صحافیوں کی فلاح و بہبود کے لیے انقلابی اقدامات کر رہی ہیں۔ اس سلسلے میں جرنلسٹ سپورٹ فنڈ کی رقم کو دو گنا کر کے 5 کروڑ سے بڑھا کر 10 کروڑ روپے کر دیا گیا ہے۔ مزید برآں، 23 صحافیوں کی بیٹیوں کی شادی اور 63 صحافیوں کے علاج و معالجے کے لیے فنڈز کے اجرا ءکی منظوری بھی دے دی گئی ہے۔عظمیٰ بخاری نے کہا کہ مریم نواز صحافی برادری کے حقوق کے تحفظ کے لیے پرعزم ہیں اور بہت جلد ہمت کارڈ اور ہیلتھ کارڈ کا اجرا مکمل کر دیا جائے گا، تاکہ صحافیوں کو مزید سہولیات فراہم کی جا سکیں۔وزیر اطلاعات نے اس عزم کا اظہار کیا کہ پنجاب حکومت صحافیوں کے مسائل کے حل کو اپنی اولین ترجیح سمجھتی ہے۔ اس ضمن میں جرنلسٹ سپورٹ فنڈ کے حوالے سے ایک اہم اجلاس ہوا، جس کی صدارت وزیر اطلاعات پنجاب عظمیٰ بخاری نے کی۔ اجلاس میں 85 صحافیوں کے لیے سپورٹ فنڈز جاری کرنے کی منظوری دی گئی، جبکہ فنڈز کی کمی کے باعث باقی رہ جانے والی درخواستوں کو آئندہ سہ ماہی میں شامل کیا جائے گا۔ اجلاس میں ایڈیشنل انفارمیشن سیکریٹری محمد نواز گوندل، ڈپٹی سیکریٹری فنانس رافعہ قیوم، ڈی جی پی آر غلام صغیر شاہد اور صدر لاہور پریس کلب ارشد انصاری سمیت دیگر اعلیٰ حکام نے شرکت کی۔
