خصوصی رپورٹ۔۔
چیئرمین بحریہ ٹائون ملک ریاض حسین نے کہا ہے کہ کورونا وائرس اور لاک ڈائون کی وجہ سے ہمارے لاکھوں نوجوان بیروزگار ہیں‘ وہ اپنے بیوی بچوں کیلئے دو وقت کی روٹی بھی نہیں کما پا رہے۔ انشاء اللہ وہ اربوں روپے خرچ کر کے کسی پاکستانی کو بھوک سے نہیں مرنے دینگے۔ اپنے جملہ وسائل جو اللہ تعالیٰ نے انہیں دے رکھے ہیں وہ سارے وسائل خرچ کر کے بھی راولپنڈی اسلام آباد‘ کراچی‘ لاہور کی غریب بستیوں میں اپنے ٹرکوں کے قافلے بھجوا کر ضرورتمند‘ بیروزگار خاندانوں میں ہزاروں روپے مالیتی راشن کے بیگز تقسیم کرینگے اور یہ سلسلہ انہوں نے ہنگامی بنیادوں پر شروع کرا دیا ہے۔ بحریہ ٹائون کے درجنوں ٹرک امدادی کاموں کیلئے مخصوص کر دیئے گئے ہیں۔ ہر راشن بیگ میں روزمرہ استعمال کیلئے آٹا‘ چینی‘ چاول‘ دالیں‘ کوکنگ آئل‘ خشک دودھ‘ کھجوریں اور دیگر مہینے بھر کیلئے ضروری اشیاء رکھی جاتی ہیں۔ راشن تقسیم کے دوران اور دستر خوانوں میں کورونا سیفٹی پروٹوکول کا خصوصی اہتمام کیا گیا ہے۔ بحریہ ٹائون کی ٹیمیں بیحد ذمہ دار ہیں‘ اسکے باوجود وہ راولپنڈی اسلام آباد کے دیہات‘ لاہور کی غریب بستیوں‘ کراچی کے غریب اور دیہی علاقوں میں وہ بحریہ ٹائون کے ٹرکوں کے قافلوں کے ذریعے راشن کی تقسیم کو خود بھی اچانک جا کر دیکھتے ہیں۔ اللہ کے فضل و کرم سے بحریہ ٹائون کا سینکڑوں افراد پر مشتمل عملہ بڑی دیانتداری سے غریب پاکستانیوں کی آڑے وقت میں خدمت کرنے میں مصروف ہے۔ ملک ریاض حسین این ڈی ایم اے کے سربراہ کے ساتھ مسلسل رابطے میں ہیں۔۔ این ڈی ایم اے کے سربراہ کا کہنا ہے کہ غریبوں کی جن بستیوں کی فہرست دیتے ہیں بحریہ ٹاؤن کی ٹیمیں اگلے ہی روز وہاں پہنچ کر رمضان راشن بیگز تقسیم کرتی ہیں اور یہ سلسلہ آخری روزے تک چلے گا۔۔ عید کے بعد اتھارٹی سفید پوش لاکھوں لوگوں کے لئے مفت کھانے کے دسترخوان شروع ہوجائیں گے جہاں پر اعلیٰ معیار کا کھانا کرسی میز پر مستحق‘ سفید پوش لوگوں کو پیش کرنے کا سلسلہ جاری رکھا جائیگا۔ ان دستر خوانوں پر روزانہ لاکھوں پاکستانیوں کو باعزت طریقے سے مفت کھانا پیش کیا جاتا ہے اور کسی سے یہ نہیں پوچھا جاتا کہ وہ مستحق ہے یا کہ نہیں۔ ملک ریاض حسین کی خصوصی ہدایت پر بحریہ ٹائون کے ذمہ دار شعبے نے اسلام آباد‘ لاہور اور کراچی کے دور افتادہ دیہات میں یومیہ 15ہزار مستحق‘ غریب خاندانوں کو پورے مہینے کا راشن تقسیم کرنا شروع کر دیا ہے۔ بحریہ ٹائون کراچی رمضان کے علاوہ پورا سال روزانہ کی بنیاد پر 200سے زائد راشن بیگز ضرورت مندوں میں تقسیم کر رہا ہے۔ لاہور میں 8ہزار سے زائد مستحق غریب خاندانوں میں بحریہ ٹائون رمضان المبارک کے پورے مہینے کا راشن تقسیم کر رہا ہے۔ بحریہ ٹائون راولپنڈی‘ اسلام آباد جڑواں شہروں کے 25سے زائد دیہات‘ قصبات میں یومیہ 25سو سے زائد خاندانوں میں مہینے بھر کا راشن تقسیم کرنے لگا ہے۔ اس میں آٹا‘ چینی‘ چاول‘ گھی‘ دالیں‘ خشک دودھ‘ کھجوریں اور دیگر اشیاء خصوصی انتظامات کے تحت تقسیم کر رہا ہے۔ بحریہ ٹائون کی ترجمان ندا ظہور نے جنگ کو بتایا کہ اس مقصد کیلئے 36موٹر گاڑیوں کے قافلے نے ایک شیڈول تیار کیا ہے جس کے مطابق وہ ہزاروں خاندانوں کیلئے یومیہ راشن کی تقسیم جاری رکھے ہوئے ہے۔ملک ریاض،بحریہ ٹاؤن کی ترجمان سے جنگ کے سینئر رپورٹر حنیف خالد نے انٹرویو کیا جس میں یہ تمام دعوے سامنے آئے جو آپ نے ابھی اوپر پڑھے۔۔
دوسری طرف ملک ریاض کا یہ حال ہے کہ دوسروں کے لئے راشن اپنوں کے لئے بھاشن۔۔ جو لاک ڈاؤن میں لاکھوں نوجوانوں کی بیروزگاری پر غمزدہ ہے، جو غریب بستیوں میں راشن پہنچارہا ہے، وہیں اس کے اپنے ورکرز بھوکی نظروں سے ان کی جانب دیکھ رہے ہیں۔۔ پپو کا کہنا ہے کہ سربراہ بحریہ ٹائون ملک ریاض نے اپنا وعدہ وفا نہ کیا آپ نیوز کے ورکرز کو تنخواہ نہ مل سکی آپ نیوز شٹ ڈاؤن ہوا تو ملک ریاض کی ہدایت پر جاری کردہ ای میل میں ملازمین کو نوٹس پیریڈ کی تنخواہ بائیس اور تیئس اپریل تک ادا کرنے کی یقین دہانی کروائی تھی جو ڈیڈ لائن گزر گئی اور ورکرز کو تاحال تنخواہ ادا نہ ہوسکی رمضان المبارک اور لاک ڈائون میں بیروزگار ہونے والے کئی سو ورکرز بے یار ومددگار ہیں کوئی صحافتی تنظیم بھی انکے حقوق لئے میدان میں نہیں آئی جبکہ پپو کے بتانا ہے اگر چند روز میں تنخواہ ادا نہ ہوئی تو بیروزگار ورکرز کا ایک گروپ باضابطہ طور سپریم کورٹ سے رجوع کریگا تاکہ بروقت اور اضافی تنخواہوں کی ادائیگی لئے بحریہ ٹائون انتظامیہ کو عدالتی حکم کے ذریعے پابند کروایا جاسکے ملک ریاض اپنے فیس بک پیج پر روزانہ نئی ویڈیوز اپلوڈ کررہے ہیں جس میں ہزاروں مستحقین تک راشن پہنچانے کا دعوی کیا جارہا جبکہ بیروزگار کیے گئے ورکرز کی کوئی فکر نہیں انہیں آپ نیوز کے بیروزگار ورکرز نے حکومت پاکستان اور صحافتی تنظیموں سے انکے جائز حقوق لئے آواز بلند کرنیکا مطالبہ کیا ہے تاکہ ماہ مقدس اور عید بہتر طور گزار سکیں۔۔(خصوصی رپورٹ)۔۔
