سوشل میڈیا پر معیشت سے متعلق پروپیگنڈا کرنے والوں کے خلاف حکومت نے گھیرا تنگ کرنے کا فیصلہ کرلیا ۔ ” سماء نیوز ” کے مطابق گزشتہ روز ہونے والے قومی سلامتی کمیٹی کے اجلاس میں معیشت سے متعلق منظم پروپیگنڈا کرنے والوں پر ہاتھ ڈالنے کی سفارش کی گئی تھی ، وزیر خزانہ نے قومی سلامتی کمیٹی کے اجلاس میں ملک کے دیوالیہ ہونے کے خدشات کو بے بنیاد قرار دیا تھا جبکہ چند ہفتوں میں معاشی حالت بہتر ہونے کا یقین دلایا ہے ۔نجی ٹی وی کے مطابق اجلاس کے شرکاء نے ملک کے ڈیفالٹ کرنے کے بیانیہ کو دشمن ایجنڈا قرار دیا اور سوشل میڈیا پر پروپیگنڈا میں ملوث افراد کے خلاف کارروائی کی سفارش بھی کی ۔نجی ٹی وی نے ذرائع کے مطابق کہا کہ قومی سلامتی کے پیر کو ہونے والے اجلاس میں ملکی معیشت اور سلامتی پر واضح گائیڈ لائن کی منظوری دی جائے گی ، اجلاس میں دہشتگردوں کیخلاف فیصلہ کن کارروائیوں کی منظوری بھی لی جائے گی ۔
