کے یو جے کی جانب سے کراچی پریس کلب کی باڈی کے اعزاز میں استقبالیہ ۔۔۔۔۔۔

کراچی یونین آف جرنلسٹس کی جانب سے کراچی پریس کلب کی باڈی کے اعزاز میں استقبالیہ دیا گیا۔ تقریب میں کراچی پریس کلب اور کراچی یونین آف جرنلسٹس اور پی ایف یو جے کے عہدیداروں نے شرکت کی۔ تقریب سے خطاب کرتے ہوئے صدر پی ایف یو جے جی ایم جمالی نے کہا کہ کراچی پریس کلب کی موجودہ باڈی سال بھر سرگرم رہی ہے اچھا کام کرنے پر پریس کلب کی منتخب باڈی سے ہمیشہ تعاون رہے گا۔ اور اگر عام ممبر کے مفاد کے خلاف کوئی کام ہوگا تو آواز بھی بلند کریں گے۔ تقریب سے خطاب کرتے ہوئے صدر کراچی پریس کلب سعید سربازی نے کہا کہ ایک سال کے دوران پریس کلب نے شاندار کامیابیاں حاصل کی ہیں۔ وومین کامپلیکس کا قیام ، ماجد خان فٹنس کلب کا قیام ، ہاکس بے اسکیم کے پلاٹوں سے قبضہ ختم کروایا ہے۔ سیکریٹری کراچی پریش کلب شعیب نے اپنے خطاب میں کہا کہ کراچی پریس کلب کے 700 نئے ممبران کے پلاٹوں کا مسئلہ بھی حل ہوگیا ہے بہت جلد باقی ماندہ ممبران کو بھی پلاٹ ملیں گے۔ صدر کے یو جے اعجاز احمد نے خطاب کرتے ہوئے کہا کہ کے یو جے کی جانب سے پریس کلب کی باڈی کے اعزاز میں استقبالیہ دینے کا مقصد ان کے اچھے کاموں کو سراہنا ہے۔ تقریب میں کراچی پریس کلب کی گورننگ باڈی کے تمام ارکان کو اجرکیں پہنائی گئیں۔ تقریب میں کے یو جے دستور کے صدر خلیل اللہ ناصر جنرل سیکریٹری نعمت خان، امتیاز خان فاران ، رضوان بھٹی، پیپ کے صدر جمیل احمد ،پی ایف یو جے مرکزی رہنما سعید جان بلوچ، شاہد غزالی، راہب گاہو، منیر ساقی سمیت کے یو جے اور کراچی پریس کلب کے سینئر ارکان نے شرکت کی۔