سوشل میڈیا پر ایک ویڈیو تیزی کے ساتھ وائرل ہوئی ہے جس میں اداکار علی رحمان خان کو مکڈونلڈز کے کیشیئر پر رعب جماتے ہوئے دیکھا جاسکتا ہے، ویڈیو وائرل ہونے کے بعد اداکار نے وضاحت کرتے ہوئے کہا ہے کہ انہوں نے جان بوجھ کر یہ ویڈیو لیک کی تھی ۔اپنے ایک ویڈیو پیغام میں علی رحمان خان نے کہا کہ انہوں نے معاشرتی تجربے کے طور پر یہ ویڈیو خود ہی سوشل میڈیا پر وائرل کرائی تھی۔ یہ ویڈیو بنانے کا مقصد یہ تھا کہ وی آئی پی کلچر اور ’ تم جانتے ہو میں کون ہوں‘ کی دھونس کے خلاف آواز بلند کی جائے۔اداکار نے اس بات پر خوشی کا اظہار کیا کہ پاکستانیوں نے انہیں ویڈیو سامنے آنے پر لتاڑا اور برا بھلا کہا۔ اداکار کے مطابق انہیں اس بات کی خوشی ہے کہ پاکستانیوں نے آواز اٹھائی اور اس معاملے کو اجاگر کیا، ہم لوگ آواز اٹھاتے ہیں مگر اس پر عمل نہیں کرتے، ہمیں نہ صرف اس طرح کے معاملات پر آواز اٹھانی چاہیے بلکہ ان پر عمل بھی کرنا چاہیے اور اپنے بچوں کو بھی سکھانا چاہیے۔دریں اثنا سوشل میڈیا پر وائرل ہونے والی وڈیو میں دیکھا جاسکتا ہے کہ اداکار علی رحمان کاؤنٹر پر موجود کیشیئرپر اپنے اداکار ہونے کا رعب جھاڑ رہے ہیں۔ اداکار نے کیشیئر سے کہا ، آپ کو پتا ہے میں کون ہوں، آپ نے مجھے ٹی وی پر دیکھا ہے؟ آپ ملازم ہیں ، آپ کا کام ہے میری بات ماننا، یہ سارے اپنا کام کر رہے ہیں، میں آپ کو پیسے دے رہا ہوں۔اس سے پہلے کہ علی رحمان خان کیشیئر پر مزید چڑھائی کرتے ان کی نظر اس شخص پر پڑ گئی جو خفیہ طور پر ان کی ویڈیو ریکارڈ کر رہا تھا۔ ویڈیو بنانے والے کی طرف دھیان جاتے ہی علی رحمان نے خاموشی اختیار کرلی اور اس کی طرف بڑھنے لگے جس پر اس نے اپنا کیمرا بند کردیا۔سوشل میڈیا پر علی رحمان کی ویڈیو سامنے آنے کے بعد انہیں کڑی تنقید کا سامنا ہے ۔۔
