کراچی پریس کلب ظلم کے خلاف آواز ہے، کشمیری رہنما۔۔

 جماعت اسلامی آزاد کشمیر کے مرکزی رہنما راجہ فاضل حسین تبسم نے کہا ہے کہ کراچی پریس کلب صحافیوں سمیت معاشرے میں ظلم کے خلاف آواز ہے ، صحافی ہر مہذب معاشرے کا چہرہ ہوتا ہے، مالی بحران میں ہمارے صحافی بھی بری طرح سے متاثر ہیں۔ جمہوریت کے لئے کراچی پریس کلب کی جدوجہد تاریخ میں درج ہے۔ آزاد کشمیر میں ایک کروڑ پودے لگا رہے ہیں، مقبوضہ جموں کشمیر کی آزادی کے لئے لازوال قربانیاں دی ہیں ، آج بھی قیادت پابند سلاسل ہے ، ہر ممکن کوشش ہے کہ تحریک زندہ رہے ، کلمہ کی بنیاد پر قائم پاکستان کے ساتھ رہنا کشمیریوں کے ایمان کا حصہ ہے ، کشمیر کے ہر گھر میں شہداء کے وارث ہیں ، پاکستان کی طرف سے کشمیری عوام کے لئے کردار کم ہوا ہے جسے پورا کرنا اشد ضروری ہے، حال ہی میں مہنگائی کے خلاف عوامی تحریک کا آغاز ہوا اور مطالبات منوانے گئے ، اپنے سیاسی کیریئر میں ایسے مناظر نہیں دیکھے تھے کہ مظاہرین کے لئے تاجروں نے اپنی خدمات پیش کر دیں۔ ان خیالات کا اظہار انہوں نے ہفتہ کو  کراچی پریس کلب میں صحافیوں سے ملاقات کے دوران گفتگو کرتے ہوئے کیا ، ان کے ہمراہ سیکریٹری حلقہ پاکستان برائے کشمیری مہاجرین راجہ محمد صغیر خان اور امیر ضلع کراچی برائے کشمیری مہاجرین سردار عبدالحمید خان بھی موجود تھے جبکہ کراچی پریس کلب کے سیکریٹری شعیب احمد ، مقصود یوسفی ، اے ایچ خانزادہ،  نواب قریشی، ارمان صابر ، نصراللہ چوہدری ، امتیاز علی ، شمس کیریو سمیت دیگر صحافی بھی موجود تھے۔ سیکریٹری کراچی پریس کلب شعیب احمد نے مہمانوں کو خوش آمدید کہتے ہوئے آگاہ کیا کہ کراچی پریس کلب تاریخی اعتبار سے جمہوریت کے لئے ہمیشہ جدوجہد کی ہے اور اراکین کے حقوق سمیت معاشرے کی عکاسی میں بھی اہم کردار ادا کیا ہے۔ رہنما جماعت راجہ فاضل حسین تبسم نے صحافیوں سے گفتگو میں کہا کہا کہ کشمیر میں ہم نے تعلیم کے شعبہ میں متعدد معیاری تعلیمی ادارے قائم ہیں اور پہلی 22 پوزیشنز حاصل کرنے والے ہمارے ہی تعلیمی اداروں کے طلبہ و طالبات حاصل کرتے ہیں، اب آئی ٹی کے شعبہ میں کراچی جماعت کا بنو قابل پروگرام کو کشمیر میں منعقد کرنے جا رہے ہیں، آزاد جموں کشمیر میں جماعت اسلامی ایک کروڑ پودے لگا رہے ہیں۔ کشمیر کی آزادی کے لئے لازوال قربانیاں ہیں ، آج بھی مقبوضہ جموں کشمیر میں جماعت اسلامی کی قیادت پابند سلاسل ہے۔ اسلامی ملاقات کے دوران پی ایف یو جے کے سیکریٹری جنرل اے ایچ خانزادہ نے خطاب کرتے ہوئے کہا کہ کشمیر سے سیاسی رہنماؤں کی آمد ہمارے لئے نہ صرف خوشی کا باعث ہے بلکہ موجودہ حالات کے تناظر میں اس کی بہت اہمیت ہے ، کشمیر پاکستان کی شہ رگ ہے ، کشمیری چاہے آزاد رہیں یا پاکستان سے الحاق کریں قبول ہے لیکن تیسرا کوئی آپشن نہیں ہے اب پاکستانیوں کا رویہ مستقبل کا تعین کرے گا یہی زمینی حقائق بھی ہیں۔انہوں نے مزید کہا کہ سید علی گیلانی کا نعرہ پوری دنیا نے سنا کہ ہم پاکستانی ہیں اور پاکستان ہمارا ہے اور امید ہے کہ کشمیری رہنماؤں کا دورہ خلیج ختم کرنے میں کردار ادا کرے گا۔