انگلینڈ بریڈفورڈ میں مقیم جیو نیوز و جنگ لندن کے نمائندے عبید مغل کے والد کو ڈاکوؤں نے کراچی میں لوٹ لیا۔ مسلح ڈاکوؤں نے انکے والد حاجی گل رحمن سےاسلحہ کے زور پر گیارہ لاکھ روپے چھینے اور باآسانی فرار ہوگئے۔عبید مغل کے مطابق کراچی ضلع ملیر شاہ لطیف تھانے کی حدود میں گزشتہ روز دوپہر ایک بجے دو موٹر سائیکلوں پر سوار، تین مسلح ڈاکوؤں نے انکے والد حاجی گل رحمن کو ان کو گھر کے دروازے پر گن پوائنٹ پر لوٹ لیا۔ انکے والد جو کہ مقامی تاجر ہیں وہ گیارہ لاکھ روپے کی رقم نیشنل ہائے وے پر قائم بینک اسلامی کی برانچ سے نکال کر السید سینٹر اپنے گھر پہنچے تھے کہ دو موٹر سائیکلوں پر سوار تین ڈاکوؤں نے جو ان کا بینک سے ہی پیچھا کررہے تھے، موقع پاتے ہی انکے والد کو گھر کے دروازے پر بندوق کی نوک پر روک لیا اورگیارہ لاکھ روپے لوٹ لئے ۔ مزاحمت کرنے پر انکے اسی سالہ بزرگ والد کے کپڑے پھاڑ دیئے۔ واقعہ کی ایف آئی آر مقامی تھانے میں درج کرلی گئی ہے۔ عبید مغل کا کہنا ہے کہ اگر پولیس راستے میں موجود دیگر کیمروں کا بھی معائنہ کرے تو ڈاکوؤں تک بآسانی پہنچا جاسکتا ہے مگر پولیس اس سلسلے میں کوئی دلچسپی نہیں رکھتی۔ اپنی مدد آپ کے تحت عبید مغل کے بھائی نے سی سی ٹی وی فوٹیج پولیس کے حوالے کردئیے ہیں۔
