کرائم رپورٹرز ایسوسی ایشن نے کراچی پولیس چیف سے جعلی صحافیوں کے خلاف قانونی کارروائی کا مطالبہ کردیا اور ساتھ ہی اپنے اراکین کرائم رپورٹرز کی فہرست بھی سٹی پولیس چیف کے حوالے کردی۔۔ کرائم رپورٹرز ایسوسی ایشن کے ایک وفد نے صدر سمیر قریشی اور سیکرٹری راجہ طارق کی قیادت میں کراچی پولیس چیف سے پولیس ہیڈآفس میں ملاقات کی۔۔ملاقات میں تمام زونل ڈی آئی جیز بھی موجود تھے۔۔ملاقات میں پیرکے روز صحافیوں کے ساتھ ہونے والے ناخوشگوار واقعات پر بھی بات چیت کی گئی۔۔کرائم رپورٹرز ایسوسی ایشن کے وفد کیجانب سے پولیس کے سینئر افسران کو ناخوشگوار واقعات پر فوری نوٹس لینے اور ذمہ داروں کیخلاف کارروائی کرنے پر سراہا گیا۔کرائم رپورٹرز ایسوسی ایشن کے صدر نے ایسوسی ایشن کے ممبران کرائم رپورٹرز کے ناموں کی فہرست دی اور شہر میں جعلی صحافیوں کیخلاف قانونی کارروائی کا مطالبہ کیا۔سمیر قریشی کا کہنا تھا کہ شہر قائد میں جعلی صحافی پولیس افسران و اہلکاروں کو بلیک میل کر کے اپنے مقاصد پورے کرتے ہیں جس کا قلع قمع کرنا ناگزیر ہے۔کراچی پولیس چیف نے سی آر اے کی فراہم کردی فہرست کی شہر کے تمام تھانہ جات میں ترسیل کی ہدایت جاری کیں۔ایڈیشنل آئی جی کراچی نے لاک ڈاؤن کے دوران کیمرہ مین، فوٹو گرافرز اور رپورٹرز سمیت عوام سے انتہائی خوش اخلاقی سے پیش آنے کا حکم دیا۔ایڈیشنل آئی جی کراچی سے ملاقات میں کرائم رپورٹرز ایسوسی ایشن کے صدر سمیر قریشی، نائب صدر ذیشان شاہ، جنرل سیکرٹری راجہ طارق، جوائنٹ سیکرٹری کاشف ہاشمی، رجب علی، وحید جیلانی، ندیم جان، سلمان لودھی، ریحان چشتی، عاطف رضا اور فیضان جلیل شامل تھے۔
