استحقاق ایکٹ کا اطلاق صحافیوں پر نہیں ہوگا۔۔

سپیکر پنجاب اسمبلی پرویزالٰہی کی زیر صدارت پنجاب اسمبلی کا اجلاس ہوا۔ اجلاس میں پرائیویٹ ممبرز ڈے پر پاکستان مسلم لیگ کے منڈی بہاؤالدین سے رکن ساجد احمد خان بھٹی نے ایوان میں استحقاق ترمیمی بل پیش کیا جسے ایوان نے متفقہ طور پر منظور کر لیا۔ اس موقع پرسپیکر پرویزالٰہی نے کہا کہ استحقاق ترمیمی بل پر صحافیوں کے تحفظات کو دور کر دیا ہے ، بل کے تحت استحقاق ایکٹ سے صحافیوں سے متعلق شقوں کو نکال دیا گیا، استحقاق ایکٹ کا اطلاق اب صحافیوں پر نہیں ہو گا، پرنٹ اور الیکٹرانک میڈیا کے صحافی استحقاق ایکٹ کی شقوں سے مستثنی ٰہوں گے ۔ بل ایوان میں سپیکر پرویزالٰہی کی خصوصی ہدایت پر پاکستان مسلم لیگ کے ساجد احمد خان بھٹی نے پیش کیا۔