سماجی رابطے کی ویب سائٹ انسٹاگرام نے اپنے صارفین کی دیرینہ خواہش کو پورا کرنے پر کام شروع کردیا ہے۔غیر ملکی میڈیا رپورٹس کے مطابق سوشل میڈیا ایپ انسٹاگرام نے ایک نئے فیچر کی آزمائش شروع کی ہے جس کے تحت صارفین کسی بھی پوسٹ کو ری پوسٹ کرسکیں گے، انسٹاگرام کے بعض صارفین کو اس فیچر تک رسائی دی گئی ہے۔نئے فیچر کے تحت صارفین کی تمام پوسٹس کو دوسرے صارفین شیئر نہیں کر سکیں گے جب کہ ممکنہ طور پر صارف کو یہ اختیار بھی دیا جائے گا کہ وہ اپنی پوسٹ کو دوسرے لوگوں کی جانب سے شیئر کرنے کے لیے کھلا رکھے یا نہ رکھے۔ری پوسٹ فیچر کے تحت انسٹاگرام صارفین دوسرے لوگوں کی تصاویر اور پوسٹس کو ری پوسٹ یا شیئر کرسکیں گے، جس طرح کوئی فیس بک کی پوسٹ کو شیئر یا ٹوئٹر پر کسی کی ٹوئٹ کو ری ٹوئٹ کیا جاتا ہے اسی طرح انسٹاگرام پوسٹس کو بھی شیئر کیا جا سکے گا۔ابتدائی طور پر ہر صارف کی محدود پوسٹس کو شیئر یا ری پوسٹ کرنے کا آپشن دیا جائے گا، جس کے بعد اسے سب کیلئے عام کردیا جائے گا۔رپورٹ کے مطابق مذکورہ فیچر ابھی ابتدائی مراحل میں ہے اور فی الحال امریکا سمیت دیگر ممالک کے محدود صارفین کو دستیاب ہے تاہم جلد ہی اس کی آزمائش کو بڑھایا جائے گا۔
