ہتک عزت کیس، علی ظفر عدالت میں پیش۔۔

لاہور کی سیشن عدالت نے میشا شفیع کے خلاف ہتک عزت کے دعوے میں ان کے بیان پر جزوی جرح مکمل کرلی۔ایڈیشنل سیشن جج خان محمود نے کیس کی سماعت کی، اداکار علی ظفر عدالت کے سامنے پیش ہوئے جبکہ میشا شفیع نے ویڈیو لنک کے ذریعے حاضری لگوائی۔دوران سماعت علی ظفر کے وکیل نے میشا شفیع کے بیان پر جرح شروع کی اور دو تصاویر عدالت کے سامنے رکھیں اور میشا شفیع سے سوال کیا کہ جنسی ہراسانی کے الزامات لگانے کے بعد آپ نے علی ظفر کے ساتھ دو تصاویر سوشل میڈیا پر پوسٹ کیں جس میں کافی خوشگوار موڈ میں لگ رہی ہیں۔جس پر میشا شفیع نے جواب دیا کہ تصویر سے کوئی یہ نہیں بتا سکتا کہ تصویر میں موجود شخص کیا محسوس کر رہا ہے، تصویر سوشل میڈیا پر اپلوڈ کرنے کا یاد نہیں، میں نے می ٹو مہم کیلئے کوئی فنڈنگ نہیں لی۔عدالت نے آئندہ سماعت پر وکلا کوجرح مکمل کرنے کی ہدایت کرتے ہوئے کارروائی 28 مارچ تک ملتوی کر دی، واضح رہے علی ظفر نے جنسی ہراسانی کے الزامات لگانے پر میشا شفیع کے خلاف ہرجانے کا دعویٰ دائر کر رکھا ہے۔