سندھ کے وزیر اطلاعات سید ناصر حسین شاہ نے کہاہے کہ جیو کے دفتر پر جو کچھ بھی کیا گیا اس کی مذمت کرتے ہیں ،جو بھی ملوث ہیں اس کے خلاف سخت ایکشن لیا جائے گا،احتجاج پر امن طریقے سے سب کا حق ہے ۔ان خیالات کا اظہار انہوں نے جیو نیوز کے دفتر کے باہر میڈیا سے بات چیت کرتے ہوئے کیا ۔ صوبائی وزیر اطلاعات نے کہاکہ کسی کوناگوار بات گزری ہے یا دل آزاری ہوئی ہے تو پرامن احتجاج کر سکتا ہے۔ سید ناصر حسین شاہ نے کہاکہ وزیراعلی سندھ نے واقعے کا نوٹس لیاہے،جو بھی نقصان ہوا ہے سندھ حکومت اس کا ازالہ کرے گی۔ انہوںنے کہاکہ تمام لوگوں کی سی سی ٹی وی فوٹیج موجود ہے ایف آئی آر بھی ہوگی اور ایکشن بھی ہوگا ،جیسے جیو کی انتظامیہ کہے گی ایکشن ہوگا ، سید ناصر حسین شاہ نے کہاکہ سندھی قوم تاریخی قوم ہے، سندھی قوم یا سندھ کی توہین نہیں ہونے دیں گے،اگر کسی کے ذہن میں یہ بات ہے تو نکال دے۔ انہوں نے مزید کہاکہ کسی کے انفرادی فعل کا پورے ادارے کو ذمہ دار نہیں قرار دیا جاسکتا ،جیو نے اسی وقت ہی معذرت کرلی تھی، صوبائی وزیر سید ناصر حسین شاہ نے کہاکہ جو لوگ شرپسند ہیں ان کی نشاندہی کی جائے گی اوران کے خلاف قانونی کارروائی کی جائے گی۔
