خصوصی رپورٹ۔۔
عالمی سرچ انجن گوگل نے پاکستان میں رواں سال میں سب سے زیادہ سرچ کیے جانے والے موضوعات کی فہرست جاری کردی۔جیونیوز کے مطابق گوگل نے پاکستان سرچ کے سالانہ نتائج کا اعلان کر دیا ہے جس میں سال 2020 کے دوران پاکستان میں گوگل پر تلاش کے اجتماعی رجحانات کی عکاسی کی گئی ہے۔ تاہم کسی بھی دوسرے سال کی مانند اس سال بھی پسندیدہ کھیل کرکٹ پر مبنی رجحان تمام اقسام کی تلاش پر چھایا رہا۔ 2020میں پاکستانیوں نے سب سے زیادہ اپنے پسندیدہ کھیل کرکٹ کے حوالے سے معلومات جاننے کی کوشش کی اور پاکستان بمقابلہ انگلینڈ کو سب سے زیادہ سرچ کیا گیا۔ اس کے علاوہ جن موضوعات کو سب سے زیادہ سرچ کیا گیا ان میں کورونا وائرس، پاکستان بمقابلہ زمبابوے کرکٹ سریز، گوگل کلاس روم، یو ایس الیکشن 2020، پی ایس ایل 2020، بھارت بمقابلہ نیوزی لینڈ، انگلینڈ بمقابلہ آسٹریلیا،انگلینڈ بمقابلہ ویسٹ انڈیز، ورلڈومیٹرزشامل ہیں۔ دریں اثنا گوگل کی جانب سے پاکستان میں سرچ ٹرینڈز کی تفصیلات جاری کردی گئی ہیں جن کے مطابق پاکستانیوں نے سال 2020 کے دوران جس شخصیت کو سب سے زیادہ سرچ کیا وہ سماجی کارکن ماروی سرمد تھیں۔ ذیل میں ہم گوگل پر سرچ کی گئی ٹاپ 10 شخصیات کی فہرست اور انہیں سرچ کیے جانے کی مختصر وجوہات پیش کر رہے ہیں ۔ کسی بھی شخصیت کی ’وجہِ سرچ‘ تفصیل کے ساتھ جاننے کیلئے اس کے نام پر کلک کریں۔
پاکستانیوں نے سال 2020 میں گوگل پر سب سے زیادہ ماروی سرمد کو سرچ کیا۔ انہیں سب سے زیادہ مارچ کے مہینے میں اس وقت گوگل پر سرچ کیا گیا جب ان کا ڈرامہ نویس خلیل الرحمان قمر سے لائیو ٹی وی پروگرام کے دوران تنازعہ ہوا تھا۔گوگل سرچ پر 2020 میں دوسرے نمبر پر اداکارہ عظمیٰ خان رہیں جو ایک شادی شدہ شخص کے ساتھ اپنے سکینڈل کی وجہ سے خبروں کی زینت بنی رہیں۔پاکستانیوں نے امریکہ کے نو منتخب صدر جوبائیڈن کو تیسرے نمبر پر سب سے زیادہ سرچ کیا۔ چونکہ امریکہ میں یہ الیکشن کا سال تھا اس لیے جوبائیڈن پاکستان سمیت دوسرے ممالک میں بھی گوگل پر سرچ کیے گئے۔ڈرامہ عہد وفا سے شہرت کی بلندیوں پر پہنچنے والی اداکارہ علیزے شاہ گوگل ٹرینڈز میں چوتھے نمبر پر رہیں۔ انہیں فروری کے مہینے میں اس وقت سب سے زیادہ سرچ کیا گیا جب ان کی نازیبا تصاویرلیک ہوئی تھیں۔سکینڈل کوئین حریم شاہ سال 2020 کے دوران پاکستان میں گوگل پر سرچ کی گئی شخصیات میں پانچویں نمبر پر رہیں۔ انہیں جنوری کے مہینے میں اس وقت سب سے زیادہ سرچ کیا گیا جب یہ دعویٰ سامنے آیا کہ ان کے پاس فواد چوہدری کی نازیبا ویڈیوز ہیں۔ اس کے علاوہ حریم شاہ نے رواں برس بعض اہم شخصیات کی ویڈیوز لیک کیں جس کی وجہ سے وہ خبروں میں رہیں۔ٹک ٹاکر مناہل ملک بھی گوگل ٹرینڈز میں شامل رہیں، انہیں فحش تصاویر لیک ہونے کی وجہ سے گوگل پر سرچ کیا جاتا رہا۔گلوکار فلک شبیر پاکستان میں سب سے زیادہ سرچ کیے گئے ساتویں شخص ہیں۔ اداکارہ سارہ خان کے ساتھ شادی کی وجہ سے لوگوں نے فلک شبیر کے بارے میں جاننے کیلئے گوگل کی مدد لی۔گلوکار عاصم اظہر سال 2020 کے گوگل ٹرینڈز میں آٹھویں نمبر پر رہے، وہ مشہور گلوکار تو ہیں ہی لیکن اس سال انہیں سرچ کرنے کی وجہ گلوکاری نہیں بلکہ ہانیہ عامر سے بریک اپ رہا۔ارطغرل ڈرامے میں حلیمہ سلطان کا کردار نبھانے والی اداکارہ ایسرا بلگیچ رواں برس پاکستان میں سب سے زیادہ سرچ کی جانے والی نویں شخصیت رہیں۔اداکارہ سارہ خان رواں برس سب سے کی جانے والی شخصیات کی فہرست میں دسویں نمبر پر موجود ہیں۔ انہوں نے رواں برس گلوکار فلک شبیر کے ساتھ اچانک شادی کی وجہ سے گوگل پر سرچ کیا گیا۔
سرچ انجن گوگل نے پاکستانیوں کے 2020ء کے دوران سرچ کیے گئے ڈراموں اور ٹی وی سیریز کے حوالے اہم انکشاف کیا ہے۔سرچ انجن کے مطابق اس نے رواں سال کے دوران پاکستانیوں کی ترکی کا تاریخی ڈرامہ ارطغرل غازی کی تلاش میں سب سے زیادہ رہنمائی فراہم کی ہے۔گوگل کے مطابق ترکی کے اس تاریخی ڈرامے نے پاکستانیوں کی توجہ تمام ہی ٹی وی ڈراموں سے زیادہ حاصل کی ہے۔پاکستان ڈراموں میں ’میرے پاس تم ہو‘سب سے زیادہ دیکھا گیا لیکن وہ بھی ارطغرل غازی کے مقابلے میں پیچھے رہا ہے۔ارطغرل غازی کی سیریز پاکستان میں اتنی مشہور ہوئی کہ اسے سرکاری ٹی وی پر بھی اردو ڈب کے ساتھ دکھایا گیا۔رواں سال مارچ میں جب ملک وبائی مرض کورونا اپنے عروج کی طرف بڑھ رہا تھا، وزیراعظم عمران خان نے نوجوانوں میں اسلامی ثقافت اور اقدار کے فروغ کےلیے ٹی وی پر اس ڈرامے کو دکھانے کی خصوصی ہدایت جاری کی تھیں۔انہوں نے کہا تھا کہ میں نے جب مغرب اور بالی ووڈ کی نقالی کے حوالے سے تنبہہ کی تو مجھے بتایا گیا کہ عوام یہی دیکھنا چاہتے ہیں۔دوسری طرف عمران خان نے اس سے پہلے کہا تھا کہ ارطغرل بڑے پیمانے پر دکھائی جانے والی سیریز میں سے ایک ہے، اس میں کوئی فحاشی نہیں ہے۔سیریز کی پاکستان بے تحاشا کامیابی کے بعد یہ بحث چھڑگئی کہ ترکی اور پاکستان تفریحی صنعت کے فروغ کےلیے ایک دلچسپ منصوبے پرتعاون کریں گے،تاہم اس کی تفصیلات تاحال سامنے نہیں آسکی ہیں۔(خصوصی رپورٹ)۔۔
