کراچی کے علاقے ڈیفنس خیابان شجاعت میں گھر میں سیکیورٹی گارڈ نے فائرنگ کرتے ہوئے نو افراد کو زخمی کر دیا ۔تفصیلات کے مطابق سیکیورٹی گارڈ کی جانب سے فائرنگ جیو کے ڈرامے کی شوٹنگ کے دوران کی گئی جس سے نو افراد زخمی ہوئے جنہیں طبی امداد کیلئے جناح ہسپتال منتقل کر دیا گیاہے جبکہ پولیس نے سیکیورٹی گارڈ کو حراست میں لے لیا ہے ۔زخمیوں میں محمد یوسف، محمدزاہد ، محمد شہزاد ، محمد اکبر شامل ہیں ۔ ڈاکٹر سیمی جمالی کا کہناتھا کہ زخمیوں کی حالت خطرے سے باہر ہے ، زخمیوں کے چہرے اور بازوﺅں پر زخم آئے ہیں ۔فائرنگ کی اطلاع ملنے پر ضلع ساؤتھ پولیس کے افسران اورسندھ رینجرزکے افسران موقع پر پہنچ گئے، پولیس نے فوری جائے وقوع سے شواہد اکٹھا کر کے تفتیش شروع کردی اور فائرنگ کرنے والے سیکیورٹی گارڈ کو حراست میں لے لیا۔اس حوالے سے ایس ایس پی ساؤتھ زبیر نذیر نے ایکسپریس سے بات چیت کرتے ہوئے بتایا کہ جس بنگلے میں فائرنگ کا واقعہ پیش آیا وہ بنگلہ نجی پروڈکشن ہاؤس کی جانب سے ڈرامے کی شوٹنگ کے لیے کرایہ پرحاصل کیا گیا تھا اور فائرنگ کے واقع سے قبل پروڈکشن ہاؤس کا عملہ شوٹنک میں مصروف تھا تاہم کھانے کے وقفے کے دوران سیکیورٹی گارڈ نے انہیں کار پورچ میں کھانا کھانے سے منع کرتے ہوئے کہا کہ اس کے مالک کی گاڑی آنے والی ہے اورمالک نے کار پورچ میں کھانا کھانے سے منع کیا ہے لہذا آپ کہیں اورجا کرکھانا کھائیں۔پولیس نے بتایا کہ پروڈکشن ہاؤس ممبران کی جانب سے سیکیورٹی گارڈ کی بات نہ سننے پر وہ طیش میں آگیا اور دونوں کے درمیان تلخ کلامی ہوئی، سیکیورٹی گارڈ نے فرش پرایک فائر کیا جس کے نتیجے میں نجی پروڈیکشن ہاؤس کا عملہ زخمی ہوگیا اورکارپورچ میں بھگڈرمچ گئی۔ اس کے بعد عملہ ادھر ادھر بھاگنے لگا اور اس بھگدڑ سے مزید افراد زخمی ہوئے۔
