فی الحال دوبارہ شادی کا کوئی ارادہ نہیں، سائرہ یوسف۔۔

معروف پاکستانی اداکارہ سائرہ یوسف نے کہا ہے اپنی زندگی سے خوش ہوں، فی الحال دوبارہ شادی کرنے کا کوئی اراداہ نہیں۔حال ہی میں اداکارہ سائرہ یوسف ایک پوڈ کاسٹ میں شریک ہوئیں جہاں انہوں نے نجی زندگی اور کیریئر کے علاوہ طلاق کے بعد خواتین پر دوسری شادی کرنے کے دباؤ کے حوالے سے بھی کھل کر بات کی۔اداکارہ سائرہ یوسف نے دوسری شادی سے متعلق لب کشائی کرتے ہوئے کہا ہے کہ ملک بھر میں طلاق کی شرح بڑھ رہی ہے لیکن دوسری جانب طلاق یافتہ خواتین پر جلد ہی دوسری شادی کرنے کا دباؤ بھی کم ہو رہا ہے۔سائرہ یوسف کا کہنا تھا کہ یہ بات درست ہے کہ بہت سارے مرد خود مختار یا مالی طور پر مستحکم خواتین کو دیکھ کر پریشان ہوجاتے ہیں، انہیں ایسا لگنے لگتا ہے کہ اب مذکورہ خاتون کو ان کی ضرورت ہی نہیں۔ان کے مطابق مرد حضرات کا خیال ہوتا ہے کہ وہ ہمیشہ سے ہی خواتین کی ضرورت رہیں گے لیکن جب ان کا یہی خیال کمزور ہونے لگتا ہے تو وہ مالی طور پر مضبوط خواتین سے پریشان ہونے لگتے ہیں، خود کو غیر محفوظ تصور کرتے ہیں۔سائرہ یوسف کا کہنا تھا کہ خواتین کا مالی طور پر مستحکم ہونا سب سے اہم بات ہے، اگر وہ مالی طور پر مضبوط ہوں گی تو وہ شادی سمیت اپنی زندگی کے تمام فیصلے بہتر انداز میں کر سکیں گی۔ان کا کہنا تھا کہ جب خواتین پیسوں کو ذہن میں رکھے بغیر کسی شخص سے شادی کرتی ہیں تو شریک حیات کو اپنے مددگار کے طور پر نہیں بلکہ ساتھی کے طور پر منتخب کرتی ہیں اور اسی وجہ سے ان کا فیصلہ بہتر ہوتا ہے۔انہوں نے دلیل دی کہ معاشی طور پر کمزور خواتین کو مجبوری میں اپنے بچوں کو چھوڑ کر معاشی بہتری کے لیے شادی کرنی پڑتی ہے جو کہ انتہائی تکلیف دہ بات ہوتی ہے۔دوبارہ شادی کے سوال پر سائرہ یوسف نے کہا کہ سماج میں اب بھی خواتین کی طلاق کے بعد ان پر دوسری شادی کرنے کا دباؤ رہتا ہے اور ہر کوئی طلاق یافتہ خواتین کو مبہم انداز میں عورت کی زندگی میں مرد کی اہمیت بتاتا رہتا ہے لیکن اس باوجود کچھ بہتری آئی ہے۔ان کے مطابق اس بات میں کوئی شک نہیں کہ عورت کی زندگی میں مرد کی اہمیت بہت اہم ہے اور اس سے انکار نہیں کیا جا سکتا لیکن اب سماج کو بھی یہ بات سمجھ میں آنے لگی ہے کہ اگر کوئی خود مختار خاتون ایک شادی کی ناکامی کے بعد دوسری شادی نہیں کرنا چاہتی تو اس کی اپنی مرضی ہے۔سائرہ یوسف نے بتایا کہ ان پر اہل خانہ کی جانب سے دوسری شادی کا کوئی دباؤ نہیں، ان کے اہل خانہ کو ان کی زندگی اور فیصلوں کا احساس ہے۔اداکارہ کا کہنا تھا کہ ایک طرف جہاں ملک بھر میں طلاق کی شرح بڑھ رہی ہے، وہیں معاشرے کے بزرگ افراد میں یہ سمجھ بھی آ رہی ہے کہ ایک تعلق کو توڑ کر جلد ہی دوسرا تعلق بنانا آسان نہیں ہوتا، اس لیے خواتین پر دوسری شادیوں کا دباؤ بھی کم ہو رہا ہے۔سائرہ یوسف کے مطابق اب سماج کے زائد العمر افراد یا اہل خانہ کو یہ بات سمجھ آنا شروع ہوگئی ہے کہ طلاق کے بعد جلد دوسری شادی کرنا ہر کسی کے لیے ممکن نہی ہوتا، اس لیے ان پر بھی خاندان کی جانب سے دوسری شادی کا کوئی دباؤ نہیں۔