خصوصی رپورٹ۔۔
ترک ڈراما سیریل ’’دیریلش ارطغرل‘‘ کے اداکار اینگن التان دزیاتن المعروف ارطغرل غازی نے پاکستانی بزنس میں اور ٹک ٹاکر کاشف ضمیر کی کمپنی کے ساتھ معاہدہ منسوخ کرنے کی تصدیق کردی۔ترک اداکار اینگن التان دزیاتن نے سیالکوٹ سے تعلق رکھنے والے پاکستانی بزنس مین کاشف ضمیر کی فرم چوہدری گروپ آف انڈسٹریز کے ساتھ ایک ملین ڈالر کا پراجیکٹ سائن کیا تھا جس کے تحت اینگن التان ان کی فرم کے برانڈ ایمبیسیڈر مقرر ہوئے تھے۔ معاہدے کی شرائط و ضوابط کو حتمی شکل دینے کے لیے ترک اداکار گزشتہ برس دسمبر میں پاکستان آئے تھے۔ تاہم اب ان کی جانب سے باضابطہ طور پر یہ معاہدہ منسوخ کردیا گیا ہے۔
ترک اداکار نے ایک بیان جاری کیا ہے جس میں انہوں نے کہا کہ میں اینگن التان دزیاتن اعلان کرتاہوں کہ میں بطور سفیر پاکستانی کمپنی چوہدری گروپ آف انڈسٹریز کے ساتھ معاہدہ مسترد کرتا ہوں۔ جیسا کہ آپ جانتے ہیں میں چوہدری گروپ آف انڈسٹریز کے مالک اور مینجنگ ڈائریکٹر میاں کاشف ضمیر اور محمد اسماعیل سے ملاقات کرنے، معاہدے کی شرائط و ضوابط پر تبادلہ خیال کرنے اور معاہدے کو حتمی شکل دینے کے لیے پاکستان کے دورے پر آیا تھا۔ میرے دورے کے دوران دونوں جانب سے معاہدے کے تمام پہلوؤں پر بات کی گئی تھی اور اتفاق کیا گیا تھا۔ترک اداکار کی جانب سے جاری کیے گئے بیان کے مطابق اس معاہدے کے بارے میں پاکستانی میڈیا کی مستقل اطلاعات کے باوجود ہم نے معاہدے کی شرائط و ضوابط پر قائم رہتے ہوئے چوہدری گروپ آف انڈسٹریز کو اپنی حیثیت واضح کرنے کے لیے ایک ماہ کا وقت اور موقع دیا۔تاہم معاہدے کے بارے میں کمپنی کے ایم ڈی کاشف ضمیر کی جانب سے میڈیا کودی گئی غلط معلومات اور جھوٹ پر ہمیں سخت رنج ہوا۔ کاشف ضمیر نے معاہدے کے تحت دی گئی مدت کے باوجودکسی بھی شرائط کو پورا نہیں کیا جس کے بعد ہم نے یک طرفہ طور پر معاہدے کو منسوخ کردیا ہے۔ ترک اداکار نے کہا کمپنی نے اتفاق رائے سے نصف رقم بھی ادا نہیں کی ہے۔ اب ہمارا میاں کاشف ضمیر، محمد اسماعیل اور ان کی کمپنی چوہدری گروپ آف انڈسٹریز سے کوئی تعلق نہیں ہے۔
بیان میں ترک اداکار نے مزید کہ ہمارے دورہ پاکستان نے ہمیں پاکستان کے محبت کرنے والے لوگوں سے ملنے اور خوبصورت ملک دیکھنے کا موقع فراہم کیا۔ ہم پاک ترک تعلقات کو مزید فروغ دینے، دونوں ملکوں کے درمیان دوستی اور ایک دوسرے کی ثقافتوں کو فروغ دینے کے لیے پُرعزم ہیں۔اینگن التان نے مزید کہا پاکستانی لوگوں نے ترک ڈراموں میں جو گہری دلچسپی ظاہر کی ہے اس نے مجھے بے حد متاثر کیا ہے اور میں جلد ہی ایک بار پھر پاکستان کا دورہ کرنا اعزاز سمجھتا ہوں۔ میں آپ کو یقین دلاتا ہوں اگر اللہ نے چاہا میں دوبارہ ایک نئی اور درست منصوبہ بندی کے ساتھ جلد ہی پاکستان کا دورہ کروں گا ۔ پاکستان اور ترکی کی دوستی ہمیشہ قائم رہے۔
دریں اثنا نیونیوزکے مطابق معروف ترک ڈرامے ارطغرل غازی میں مرکزی کردارادا کرنے والے اداکار انگین آلتان نے دھوکہ دہی کے باعث پاکستانی میزبان کاشف ضمیر سے معاہدہ ختم کرنے کا اعلان کردیا ہے۔نیو نیوز کے مطابق دونوں کے درمیان معاہدہ گزشتہ سال دسمبر کے مہینے میں طے پایا تھا۔میاں کاشف ضمیر نے 10 لاکھ ڈالر میں انگین آلتان سے برانڈ ایمبیسڈر کا معاہدہ کیا تھا۔معاہدے کے مطابق کاشف ضمیر نے انہیں آدھی رقم کے طور پر چیک دیا اور آدھی رقم اشتہارات کی شوٹنگ کے بعد دی جانی تھی، لیکن انگین آلتان کی جانب سے جاری کیے گئے بیان کے مطابق انہیں ایک بھی روپیہ وصول نہیں ہوا۔ ترک اداکار انگین آلتان کے مطابق وہ اس نتیجے پر پہنچے ہیں کہ کاشف ضمیر اپنی ان حرکتوں سے باز آنے والا نہیں کیونکہ بار ہربار مہلت ملنے کے باوجود رقم کی ادائیگی کے بجائے ان کے ساتھ اور سوشل میڈیا پر مسلسل جھوٹ بول رہا ہے۔ترک اداکار انگین آلتان نے معاہدہ ختم کرتے ہوئے اعلان کیا ہے کہ وہ پاکستان کے متعلقہ حکام کو اس معاملے کی تفصیلی معلومات فراہم کریں گے کیونکہ وہ انصاف کے تقاضے پورا کرنے کے بارے میں پختہ یقین رکھتے ہیں۔
کاشف ضمیر کی انگین آلتان سے ملاقات اور اسکے ترکی کے ویزہ جاری ہونے کے حوالے سے انکشاف ہوا ہے کہ سیاسی شخصیات کی سفارشوں کے باعث تمام مراحل طے پائے۔نیو نیوز کے مطابق کاشف ضمیر نے ترکی میں سینئر صحافی اور انقرہ یونیورسٹی سے وابستہ ڈاکٹر فرقان حمید سے رابطے بڑھائے، انھیں لاہور اور ملتان کی دو اہم شخصیات کے ذریعے ویڈیو کالز کرائیں۔دونوں شخصیات نے ڈاکٹر فرقان حمید سے سفارش کی کہ کاشف ضمیر کی انگین آلتان سے ملاقات کرا دیں۔ ڈاکٹر فرقان حمید کا موقف ہے کہ وہ 30سال سے ترکی میں ہیں، جب دو اہم شخصیات نے ویڈیو کالز پر انہیں یقین دہانیاں کرائیں تو اگر وہ ان پر اعتبار نہ کرتے تو کس پر کرتے؟دوسری جانب کاشف ضمیر نے ویزا لگوانے کی کوشش کی لیکن اسلام آباد میں ترک سفارتخانے نے مختلف وجوہات کی بنا پر ویزا مسترد کر دیا۔ اس پر پنجاب کی اہم شخصیت کے فون اور لیٹر پیڈ پر ترکی کا ویزا دیا گیا۔
