اسلام آباد ہائی کورٹ میں رانا شمیم کی کردار کشی روکنے کے لیے ان کے بہو، پوتے اور پوتی کی جانب سے دائر درخواست مسترد ہوگئی۔مذکورہ درخواست میں پاکستان تحریک انصاف (پی ٹی آئی) کے 4 رہنماؤں کی نااہلی کی بھی استدعا کی گئی تھی۔درخواست کو مسترد کرتے ہوئے عدالت عالیہ نے فیصلہ دیا کہ درخواست میں اٹھائے گئے نکات ہتک عزت سے متعلق ہیں۔عدالت نے قرار دیا کہ رانا شمیم خود ان بنیادوں پر درخواست گزار نہیں بنے، درخواست دائر کرنے والے متاثرہ فریقین نہیں ہیں۔واضح رہے کہ درخواست میں استدعا کی گئی تھی کہ فواد چوہدری، وفاقی وزیر آبی امور فیصل واڈا ،صداقت عباسی، وزیرمملکت برائے اطلاعات و نشریات فرخ حبیب کو 62 ون-ایف کے تحت نااہل کیاجائے۔علاوہ ازیں درخواست میں میڈیا کو توہین عدالت کیس کے فیصلے تک رانا شمیم کی ’کردار کشی‘ روکنے کی بھی استدعا کی گئی۔درخواست میں دواینکر اورایک نجی چینل سمیت رجسٹرار گلگت بلتستان سپریم کواپیلیٹ کورٹ، رجسٹرارشہید ذوالفقار علی بھٹو یونیورسٹی، ایڈووکیٹ جنرل پنجاب کو فریق بنایا گیا تھا۔دائر کردہ درخواست میں راناشمیم کی ’کردار کشی‘ کرنے پر فرخ حبیب کو قومی نشریاتی چینل پر معافی مانگنے اور دواینکر اورایک نجی چینل کو پیمرا کوڈ آف کنڈکٹ کی خلاف ورزی پر سزا دینے کی استدعا کی گئی۔ رانا شمیم کی بہو، پوتے اور پوتی کی جانب سے راناشمیم کے بیٹے احمد حسن رانا نے درخواست دائر کی تھی۔
