کراچی یونین آف جرنلسٹس (دستور) کے صدر حامد الرحمن اور جنرل سیکریٹری سید نبیل اختر نے دھرتی ٹی وی سے صحافیوں کی جبری برطرفیوں کی شدید مذمت کی ہے۔ انہوں نے وزیر اعظم ، چیف جسٹس سپریم کورٹ اور چیئرمین پیمرا سے معاملے کا نوٹس لینے اور برطرف ملازمین اور اصل تنخواہ کی بحالی تک چینل کا لائسنس معطل کرنے کا مطالبہ کیا ہے۔ کے یو جے دستور کے رہنماؤں نے ملازمین کی فوری بحالی نہ ہونے کی صورت میں دھرتی ٹی وی کے دفترپر احتجاج اور دھرنے کا عندیہ دیتے ہوئے کہا کہ دھرتی ٹی وی سے صحافیوں کی بلاجواز برطرفی اور رمضان المبارک کے موقع پر بغیر نوٹس تمام ملازمین کی جبری برطرفی قبول نہیں ۔صحافیوں کی نمائندہ تنظیم کے رہنماؤں نے بیان میں کہا کہ ہم وزیر اعظم، چیف جسٹس سپریم کورٹ اور چیئرمین پیمرا سے فوری کارروائی کا مطالبہ کرتے ہیں۔ انتظامیہ نے دھرتی ٹی وی کے صحافیوں کو ان کی ملازمتوں سے بغیر نوٹس دئیے فارغ کیا ،ملکی قوانین کو بالائے طاق رکھتے ہوئے انہیں پیشگی اطلاع اور تنخواہوں کی ادائیگی سے متعلق کسی بھی قسم کی یقین دہانی کے بغیر ملازمتوں سے فارغ کیا۔ سیکریٹری کےیوجے دستور نے متعلقہ حکام پر زور دیا کہ وہ آزادی صحافت کے اصولوں کو برقرار رکھنے کے لئے فوری ایکشن لیں اور دھرتی ٹی وی کے صحافیوں کے ساتھ ہونے والی ناانصافیوں کے ازالے کے لئے اقدامات کریں۔ کے یو جے دستور اپنے ساتھیوں کے شانہ بشانہ ہے اور ان کے حقوق کیلئے ہر پلیٹ فارم پر رابطہ کرے گی ۔
