خیبر پختونخوا حکومت نے بھارتی فلم انڈسٹری کے لیجنڈ اداکار دلیپ کمار اور راج کپور کے گھروں کی خریداری کےلیے اقدامات تیز کردیئے ،متعلقہ مالکان سمیت تحصیلدار اور پٹواری کو نوٹس جاری کردیئے۔۔صوبائی حکومت نے پشاور میں بھارتی فلم کے لیجنڈ اداکاردلیپ کمار کے گھر اور راج کپور کی حویلی کو خریدنے کےلیے اقدامات مزید تیز کردیئے ، ضلعی انتظامیہ کی جانب سے اس سلسلے میں حتمی نوٹس جاری کردیا گیا ،جس میں متعلقہ گھروں کے مالکان کو اعتراضات جمع کرنے کی ہدایات کی گئیں ہیں۔انتظامیہ کی جانب سے کہا گیا ہے کہ 18 مئی کے بعد مالکان کی جانب سے کوئی عذر قبول نہیں ہوگا،متعلقہ تحصیلدار اور پٹواری ریکارڈ سمیت طلب کیا گیا ہے۔ڈپٹی کمشنر پشاور کی جانب سے جاری ہونے والے نوٹس میں کہا گیا ہے کہ دلیپ کمار اور راج کپور کے آبائی گھروں کے مالکان کو نوٹس دیا جاتا ہے کہ ڈائریکٹریٹ آرکیالوجی اینڈ میوزیم گورنمنٹ آف خیبرپختونخوا نے مذکورہ اراضی کے حصول کا حتمی فیصلہ کیا ہے جس میں لینڈ ایکوزیشن ایکٹ 1894کے تحت سیکشن چار ٗچھ اور سترہ پہلے ہیں نافذ کیا جاچکا ہے لہذا مالکا ن18مئی 2021کو ڈپٹی کمشنر کے دفتر میں پیش ہوکر اعتراضات و تجاویز پیش کریں ،علاوہ ازیں اپنے مالکانہ حقوق کی دستاویزات بھی لائیں،تاہم تاریخ بالا گرزنے کے بعد کوئی عذر قابل قبول نہ ہوگا ۔ متعلقہ تحصیلدار اور پٹورایوں کو بھی ریکارڈ سمیت طلب کیا گیا ہے،جبکہ نوٹسز کی کاپیاں دونوں گھروں کے باہر چسپاں کردی گئی ہیں ۔واضح رہے کہ صوبائی حکومت نے دلیپ کمار کےگھرکی قیمت 80لاکھ روپے لگائی ہے جبکہ گھر کے مالک نے 25 کروڑ روپے مانگے تھے ،صوبائی حکومت نے راج کپور حویلی کی قیمت ڈیڑھ کروڑ روپے لگائی ہے جبکہ مالک کی جانب سے 2 ارب روپے کا مطالبہ کیا گیا ہے۔۔
