اکستان کرکٹ کے دو بڑے نام وقار یونس اور وسیم اکرم اب “اے اسپورٹس” کے پلیٹ فارم سے اپنے مداحوں کو کرکٹ کی مزید اپ ڈیٹ سے باخبر رکھیں گے۔ ٹی ٹوئنٹی ورلڈ کپ کے لئے لیجنڈ کرکٹرز اور ’’ٹو ڈبلیوز‘‘کے نام سے مشہور وسیم اکرم اور وقار یونس کو شائقین کرکٹ پاکستان کے پہلے ایچ ڈی اسپورٹس چینل “اے اسپورٹس” پر سولہ اکتوبر سے دیکھ سکیں گے۔ اس حوالے سے قومی ٹیم کے سابق کپتان وسیم اکرم نے اپنے ٹوئٹ میں لکھا ہے کہ اے اسپورٹس کے ساتھ منسلک ہونے کا اعلان کرتے ہوئے بے حد خوشی ہے۔ ان کا اپنے پیغام میں کہنا تھا کہ میں نے پاکستان کے پہلے ایچ ڈی اسپورٹس چینل “اے اسپورٹس” کو بطور صدر جوائن کرلیا ہے۔ میں اپنے دوست اور اے آر وائی نیٹ ورک کے سی ای او سلمان اقبال کا شکر گزار ہوں، یہ پاکستان کے اسپورٹس اور میڈیا کیلئے بہت بڑا اقدام ہے۔ سابق کپتان وقار یونس نے اپنے ٹوئٹ میں لکھا کہ اے اسپورٹس پاکستان کا پہلا ایچ ڈی اسپورٹس چینل ہے جو آئی سی سی ٹی ٹوئنٹی ورلڈ کپ کے میچز آپ کو دکھائے گا، انہوں نے کہا کہ اے آر وائی نیٹ ورک کے سی ای او سلمان اقبال اور ان کی پروفیشنل ٹیم کے ساتھ کام کرنے کے لئے پرجوش ہوں۔ واضح رہے کہ اے اسپورٹس چینل آئی سی سی ٹی 20 ورلڈ کپ کے میچز دکھائے گا اس کے علاوہ ناظرین کھیلوں پر ماہرانہ تجزیے اور ملک کی نامور شخصیات کے تبصرے سن سکیں گے۔
