بزرگ صحافی اور اے آر وائی نیوزکے اینکرپرسن چودھری غلام حسین کو بینک فراڈ کے ایک مقدمہ میں چودہ روزہ جوڈیشل ریمانڈ پر جیل بھیج دیاگیا۔ ایف آئی اے نے جمعرات کی شب چودھری غلام حسین کو لاہور کے علاقے گلبرگ سے گرفتار کیا تھا۔۔ ڈسٹرکٹ اینڈ سیشن عدالت نے اے آر وائی نیوز کے تجزیہ کار کو 14 روزہ جوڈیشل ریمانڈ پر جیل بھیج دیا۔ ایف آئی اے نے ایک پریس بیان میں کہا کہ صحافی نے 2003 میں جعلی دستاویزات کی بنیاد پر 57 ملین روپے کا بینک قرض لیا۔جمعہ کو ایف آئی اے کے پراسیکیوٹر منیم بشیر نے عدالت کو بتایا کہ صحافی نے بینک کا قرضہ واپس نہیں کیا۔ نہوں نے عدالت سے استدعا کی کہ ان کا 14 روزہ جسمانی ریمانڈ دیا جائے۔تاہم چودھری غلام حسین کے وکیل اظہر صدیقی نے 2011 میں مقدمے کے حوالے سے پہلی انفارمیشن رپورٹ (ایف آئی آر) درج ہونے کے دس سال بعد ایف آئی اے کی کارروائی پر سوال اٹھایا۔ انہوں نے حیرت کا اظہار کیا کہ 30 سے 40 افراد بزرگ صحافی کو گرفتار کرنے کیوں آئے، گرفتاری کی اصل وجہ پوچھی جائے۔۔ جج نے ایف آئی اے پراسیکیوٹر سے سوال کیا کہ اگر صحافی کو 2013 میں اشتہاری قرار دیا گیا تو ایف آئی اے کیا کر رہی تھی جب چودھری غلام حسین تقریباً روزانہ ٹی وی چینلز پر نظر آتے تھے۔صحافی نے عدالت کو بتایا کہ تنازع 450 ملین روپے کی جائیداد کا ہے۔ اس رقم میں سے 250 ملین روپے ادا کیے جا چکے ہیں۔ تاہم، انہوں نے مزید کہا کہ اب یہ معاملہ سپریم کورٹ میں زیر التوا ہے۔ایف آئی اے کی استدعا مسترد کرتے ہوئے فاضل جج نے صحافی کو 14 روزہ جوڈیشل ریمانڈ پر جیل بھیج دیا۔
