اے پی این ایس کے اعلامیہ کے مطابق آل پاکستان نیوز پیپرز سوسائٹی کی سالانہ جنرل کونسل کا اجلاس بروز پیر20مارچ 2023ء صبح 11بجے اے پی این ایس ہائوس کراچی میں منعقد ہوگا۔ سالانہ جنرل کونسل کے اجلاس میں اخباری صنعت کی موجودہ صورتحال پر غور اور رکن مطبوعات کو درپیش مسائل کے حل کیلئے اقدامات طے کئے جائیں گے اور حکومت اور پریس کے تعلقات ،آزادی صحافت اور صنعت کے مستقبل جیسے معاملات پر سفارشات کو حتمی شکل دی جائے گی۔ اجلاس میں گزشتہ سال 2022-23ء کی ایگزیکٹو کمیٹی کی رپورٹ اور سال 2022ء کے سالانہ حسابات کی آڈٹ رپورٹ منظوری کیلئے پیش کی جائیںگی۔ جنرل کونسل کا اجلاس سال 2023-24ء کیلئے ایگزیکٹو کمیٹی کے اراکین کا انتخاب کرے گا ، نومنتخب ایگزیکٹو کمیٹی نئی مدت کیلئے اپنے عہدیداران کا انتخاب کرے گی ۔جنرل کونسل کے اجلاس میں صرف فل ممبرز مطبوعات ہی شرکت کرسکیں گے۔ سیکرٹری جنرل نے فل ممبر مطبوعات کے ناشرین سے درخواست کی ہے کہ وہ کونسل کے سالانہ اجلاس میں اپنی شرکت کو یقینی بنائیں ۔
