کراچی کی مقامی عدالت نے مرحوم عامر لیاقت حسین کی ویڈیو وائرل کرنے کے کیس میں ملزمہ دانیہ شاہ کو عدالتی ریمانڈ پر جیل بھیج دیا۔ انہیں لودھراں سے ایف آئی اے نے گرفتار کر کے راہداری ریمانڈ پر کراچی منتقل کیا تھا۔سابق رکن قومی اسمبلی مرحوم عامر لیاقت حسین کی تیسری بیوی دانیہ بی بی کو ایف آئی اے حکام نے جوڈیشل مجسٹریٹ کراچی شرقی کی عدالت میں پیش کیا۔ ایف آئی اے حکام نے موقف اختیار کیا کہ ملزمہ پر عامر لیاقت حسین کی ویڈیوز بنانے اور سوشل میڈیا پر وائرل کرنے کا الزام ہے۔ایف آئی اے کا کہنا تھا کہ یہ ویڈیوز طارق روڈ کے علاقے میں ریکارڈ کی گئیں۔ ملزمہ کے وکیل نے الزامات کو بے بنیاد قرار دیتےہوئے کہاکہ ایف آئی اے کے پاس کوئی ثبوت موجود نہیں۔ ملزمہ دانیہ شاہ نے عدالت میں بیان دیتے ہوئے کہا کہ ویڈیو میں نے وائرل نہیں کی یہ سب جائیداد کی وجہ سے میرے ساتھ کیا جا رہا ہے۔ عدالت نے ریمارکس دیئے کہ تفتیشی افسر ملزمہ کو متعلقہ عدالت میں پیش کریں۔ ویڈیوز تصاویر کی حقیقت معلوم کرنے کے لیے ضروری ہے متعلقہ عدالت میں پیش کیا جائے۔ ایف آئی اے اگر چاہے تو جیل میں جا کر تفتیش کر سکتی ہے۔مقامی عدالت نے ملزمہ دانیہ شاہ کو تاخیر سے پیش کرنے کا نوٹس لے لیا، عدالت نے ایف آئی اے کی تفتیشی افسر کو شوکاز نوٹس جاری کر دیا۔عدالت کا کہنا تھا کہ ایف آئی اے نے ملزمہ کا راہداری ریمانڈ حاصل نہیں کیا، گرفتاری کے بعد 24 گھنٹے میں عدالت میں پیش کرنا لازم ہے۔عدالت نے ملزمہ کے جسمانی ریمانڈ کی استدعا مسترد کردی۔فاضل عدالت نے ہدایت کی کہ تفتیشی افسر ملزمہ سے 19 دسمبر تک تحقیقات مکمل کریں، ملزمہ سے جیل آفیسر کی موجودگی میں تحقیقات کی جائے۔عدالت نے ملزمہ کو عدالتی ریمانڈ پر جیل بھجنے کا حکم دے دیا۔عامر لیاقت حسین کی بیٹی اور کیس کی درخواست گزار کے وکیل نے میڈیا سے گفتگو میں کہا کہ ملزمہ اکیلی نہیں یہ پورا گروہ ہے۔ مرحوم کی سابقہ اہلیہ کا کہنا تھا کہ ملزمہ کو قرار واقعی سزا ملے تاکہ مزید کوئی شکار نا بنے۔عامر لیاقت حسین کی بیٹی کی جانب سے ایف آئی اے کو درخواست کے بعد ملزمہ کو لودھرا ں سے گرفتار اور راہداری ریمانڈ پر کراچی منتقل کیا گیا تھا۔
عامر لیاقت کی تیسری بیوی کو جیل بھیج دیاگیا۔۔
Facebook Comments