امریکی قونصل جنرل کا دورہ جنگ،جیو گروپ۔۔

کراچی میں تعینات امریکی قونصل جنرل رابرٹ سلبزسٹائن نے جنگ/جیو گروپ کے دفاتر کا دورہ کیا۔ جہاں جنگ/جیو کے ایگزیکٹیوز نے انہیں میڈیا آزادی پر سپریم کورٹ کے فیصلوں اور اسلام آباد ہائی کورٹ کے جیو کی معطلی ختم کرنے کے فیصلے سے قبل ایڈیٹر انچیف میر شکیل الرحمٰن کی گرفتاری سے پیدا قانونی صورتحال اور دیگر پیش رفت سے آگاہ کیا۔ امریکی قونصل جنرل نے اپنا مؤقف بیان کرتے ہوئے کہا کہ پاکستان میں مضبوط اور متحرک میڈیا اب پہلے سے کہیں زیادہ اہمیت کا حامل ہے۔ کیونکہ کورونا وائرس جیسی عالمگیر وباء کے پیش نظر عوام کو آگاہ اور تربیت فراہم کرنے کیلئے میڈیا کا کردار بڑا اہم ہے۔ انہوں نے بتایا کہ گزشتہ 13 مارچ کو جنوبی اور وسط ایشیائی امور دفتر کے لئے پرنسپل ڈپٹی اسسٹنٹ سیکرٹری ایلس ویلز نے جنگ/جیو ایڈیٹرانچیف کی گرفتاری پر تشویش کا اظہار کرتے ہوئے پاکستان میں قانون کی حکمرانی اور آزاد میڈیا کی ضرورت پر زور دیا۔