اے کے ڈی گروپ کے چیئرمین عقیل کریم ڈھیڈی نے کراچی پریس کلب اور صحافیوں کے لیے ایک کروڑ بیس لاکھ کے پیکج کا اعلان کیا ہے،جس کے تحت کتیانہ میمن اسپتال میں ایک کروڑ روپے سالانہ میڈیکل گرانٹ اور کلب کی کینٹین کے لیے 20لاکھ روپے شامل ہیں۔ کراچی پریس کلب کے دورے کے موقع پر عقیل کریم ڈھیڈی نے کہا ہے صحافی برادری ملکی ترقی میں اہم کردار ادا کر رہی ہے مگر اس کی مشکلات کو حل کرنے کے لیے اقدامات نا کافی ہیں انہوں نے کہا کہ صحافیوں کو میڈیکل کے مسائل کا مسلسل سامنا کرنا پڑتا ہے اس لئے کتیانہ میمن اسپتال میں سالانہ ایک کروڑ روپے مختص کئے جا رہے ہیں جس سے صرف صحافیوں اور ان کے اہل خانہ کا علاج کیا جائے گا۔ انہوں کہا ہے کہ وہ صحافیوں اور حکومت کے درمیان مسائل کے حل کے لیے پل کا کردار ادا کرنے کے لیے تیار ہیں ۔اس موقع پر صدرکراچی پریس کلب فاضل جمیلی ، سیکرٹری محمدرضوان بھٹی ،فاروق سمیع ،عبدالوسیع قریشی ،سابق سیکرٹری اے ایچ خانزادہ احتشام مفتی اور دیگر بھی موجود تھے ۔عقیل کریم ڈھیڈی نے کہا کہ صحافیوں کا ملک کی ترقی اور اداروں کی مضبوطی کے لیے اہم کردار ہے ۔صحافیوں کو میڈیکل کی سہولیات کے حوالے سے بہت سے مسائل کا سامنا ہے ۔ان کو مدنظررکھتے ہوئے کتیانہ میمن اسپتال میں سالانہ ایک کروڑ روپے مختص کیے جارہے ہیں جہاں کراچی پریس کلب کے صحافی طبی سہولیات سے استفادہ کرسکیں گے ۔انہوں نے کراچی پریس کلب کی نئی کینٹین کی تعمیر کے لیے بھی 20لاکھ روپے عطیہ دینے کا اعلان کیا ۔عقیل کریم ڈھیڈی نے کہا کہ پی ایم ڈی اے کے حوالے سے صحافیوں کے تحفظات پر وہ حکومت اور صحافیوں کے درمیان پل کا کردار ادا کرنے کے لیے تیار ہیں ۔اگر صحافی چاہیں تو وہ حکومت سے بات کرکے اس حوالے سے صحافیوں اور حکومت کے درمیان میٹنگ کرواسکتے ہیں ۔انہوں نے کہا کہ وہ صحافیوں کے مسائل کے حوالے سے ہر فورم پر بات کرنے کے لیے تیار ہیں ۔عقیل کریم ڈھیڈی نے کہا کہ وزیراعظم کی کم لاگت ہائوسنگ اسکیم کے حوالے سے بھی وہ صحافیوں سے تعاون کے لیے تیار ہیں ۔صحافیوں کی لسٹ فراہم کی جائے تو وہ اس ضمن میں اپنا بھرپور کردار ادا کریں گے۔اس موقع پر پریس کلب کے سیکریٹری محمدرضوان بھٹی نے عقیل کریم ڈھیڈی کا شکریہ ادا کرتے ہوئے کہا کہ میڈیکل سہولیات کے حوالے سے صحافیوں کو کافی مشکلات کا سامنا ہے ۔ اس اقدام سے صحافیوں کو ریلیف ملے گا۔صدر فاضل جمیلی نے بھی عقیل کریم ڈھیدی کی جانب سے صحافیوں کی فلاح و بہبود کے لیے کئے گئے اقدامات کو سراہا ۔اس موقع پرصدرکراچی پریس کلب فاضل جمیلی اور سیکرٹری محمدرضوان بھٹی نے اے کے ڈی گروپ کے چیئرمین عقیل کریم ڈھیڈی کو سندھ کی روایتی اجرک اور ٹوپی کا تحفہ پیش کیا گیا ۔
