عدالت کا سوشل میڈیا پلیٹ فارمز سے فحش مواد ہٹانے کا حکم۔۔

سندھ ہائی کورٹ نے یوٹیوب، فیس بک، ٹک ٹاک سمیت دیگر سوشل میڈیا سائٹس پر غیر اخلاقی مواد اپلوڈ کرنے سے متعلق درخواست پر ایف آئی اے کو نوٹس جاری کردیئے اور فریقین سے آئندہ سماعت پر جواب طلب کرلیا، یوٹیوبر حسن بیگ و دیگر کی درخواستوں پر سماعت ہوئی، درخواست گزاروں کے وکیل نے کہا کہ سوشل میڈیا سائٹس سے بیہودہ مواد ہٹایا جائے، پی ٹی اے اپنی ذمہ داری ادا نہیں کر رہا، جو مواد دیکھایا جاتا ہے وہ اسلامی معاشرتی روایات کے خلاف ہے۔ چیف جسٹس عقیل عباسی نے اظہار تشویش کرتے ہوئے ریمارکس دیئے کہ بہت تکلیف ہوتی ہے ہم خود پریشان ہیں اس چیز سے، ہم اپنے بچوں کو اس طرح بگڑتے ہوئے نہیں دیکھ سکتے، غیر اخلاقی مواد روکنے کی کس کی ذمہ داری ہے؟ مانیٹرنگ کون کرے گا، سوشل میڈیا پر غیر اخلاقی مواد کی روک تھام کے لیے جلد سے جلد کام ہونا چاہیے۔