نیو کراچی صنعتی ایریا پولیس نے سماکے نام پر گورکنوں اور کاروباری افراد سے بھتہ لینے والے دو جعلسازوں کو گرفتار کرکے قبضے سے جعلی پریس کارڈز اور بھتے کی رقم برآمد کرلی،تفصیلات کے مطابق نیو کراچی انڈسٹریل ایریا پولیس نے خفیہ اطلاع پر کارروائی کرتے ہوئے سماٹی وی کے نام پر گورکنوں سے بھتہ وصول کرنے والے دو ملزمان توصیف اور فرمان کو گرفتار کرکے قبضے سے جعلی پریس کارڈز اور بھتے کی رقم برآمد کرلی، پولیس کا کہنا ہے کہ گرفتار ملزمان سماکے پروگرام کے نام پر گورکنوں، مٹھائی کی دکانوں اور ہوٹلز مالکان کو فون کرتے اور انہیں ہوٹلز اور دکانوں میں گندگی کے نام پر بلیک میل کرکے ان سے بھتہ وصول کرتے تھے، پولیس کا مزید کہنا تھا کہ گرفتار ملزمان نیو کراچی صنعتی ایریا کے علاقے میں واقع قبرستان کے گورکنوں کو کئی عرصے سے قبروں کی ڈبلنگ اور جرائم پیشہ افراد کی قبرستان میں موجودگی کے نام پر بلیک میل کررہے تھے اور ان سے اب تک ہزاروں روپے بھتے کی مد میں وصول کرچکے ہیں، پولیس کا کہنا ہے کہ اس حوالے سے گورکنوں نے پولیس کو اطلاع دی جس پر پولیس نے کارروائی کرتے ہوئے دونوں ملزمان کو گرفتار کرکے قبضے سے جعلی پریس کارڈز، بھتے کی رقم اور بھتہ مانگنے کے لئے استعمال ہونے والے موبائل فونز برآمد کرکے ملزمان کے خلاف دہشت گردی ایکٹ کے تحت مقدمہ درج کرکے ملزمان سے مزید تفتیش شروع کردی ہے۔
