معروف فلمساز سید نور نے کہا ہے کہ نمبر ون ٹک ٹاک اسٹار جنت مرزا کو اپنی ڈیبیو پنجابی فلم ‘تیرے باجرے دی راکھی’ کے فلاپ ہونے سے ذرا بھی فرق نہیں پڑا۔ ہم نے تو فالوورز کی وجہ سے جنت مرزا کو کاسٹ کیا تھا لیکن افسوس اُن کے فالوورز فلم دیکھنے نہیں آئے۔فلمساز سید نور نے اپنے حالیہ انٹرویو میں گفتگو کرتے ہوئے کہا کہ جنت مرزا میں ہیروئن بننے کا جذبہ نہیں تھا کیونکہ ٹک ٹاک پر اُن کے کروڑوں فالوورز تھے تو وہ اسی میں خوش تھیں۔فلمساز نے کہا کہ جنت مرزا نے کام اچھا کیا لیکن بات یہ ہے کہ اُن کے فالوورز اُن کی فلم دیکھنے نہیں آئے، کروڑوں فالوورز میں سے اگر لاکھوں بھی فلم دیکھنے آتے تو فلم بہت اچھی چل جاتی۔سید نور نے کہا کہ ٹک ٹاک اسٹارز کے فالوورز 10 سے 20 سیکنڈز کی ٹک ٹاک ویڈیوز مفت میں دیکھتے ہیں تو وہ ڈھائی گھنٹے کی فلم دیکھنے کے لیے پیسے کیوں خرچ کریں گے۔واضح رہے کہ سید نور کی ہدایتکاری میں بننے والی فلم ‘تیرے باجرے دی راکھی’ سال 2022 میں ریلیز ہوئی تھی، فلم کی میگا کاسٹ میں جنت مرزا، صائمہ نور اور بابر علی شامل تھے۔
