کراچی کے علاقے رضویہ سوسائٹی میں خاتون کو ہراساں اور بلیک میل کرنےکے الزام میں خاتون سمیت تین جعلی صحافیوں کو پولیس نے گرفتار کرلیا۔۔ پولیس کے مطابق گرفتار ہونے والے ملزمان خود کو صحافی ظاہر کرکے “ز” نامی خاتون کو بلیک میل کررہے تھے اور اس سے انچاس ہزار روپے بھی لے چکے تھے جب کہ مزید رقم کیلئے بلیک میل کررہے تھے۔ بلیک میلنگ سے پریشان خاتون نے تنگ آکر رضویہ سوسائٹی پولیس سے رابطہ کیا ، پولیس نے ملزمان کو اس وقت رنگے ہاتھوں گرفتار کیا جب وہ بھتے کی رقم کی وصولی کے لئے خاتون کے گھر پر دوبارہ آئے تھے۔پولیس کے مطابق گرفتار جعلی ملزمان کی شناخت ملک سجاد ولد ملک ممتاز، دانیال احمد ولد محمد سلیم اور سونیا زوجہ ایاز کے ناموں سے ہوئی ہوئی ہے۔ گرفتار ملزمان کے خلاف مقدمہ درج کرکے تفتیش شروع کردی گئی ہے۔ملزمان کے قبضے سے جعلی پریس کارڈ بھی برآمد ہوا ہے۔گرفتار خاتون جعلی صحافی کو وومن تھانہ منتقل کر دیا گیا ۔
